Compilatiecorpus Historisch Nederlands 1.0 (CHN): ambtelijke teksten 1250-1800: gent_1280_1

l
Weten alle deghene die nv sin ende die irna sullen commen die dese letteren sullen sien
</begin>
<main>
Dat de meesters ende de cnapen van den parmentirs van sente pieters dorpe hebben daen bescriuen wel goede pointe ende nuteleke ter parmentrien die redenlic sin ende louelic allen goeden lieden ende allen comannen bi gherads wille van meren balius van sente pieters dorpe ende bi scepenen wille van den seluen dorpe ende bi den wille van den ghemenen ambachte van den parmentirs van sente pieters dorpe Ende de welke pointe wi ghebieden hem allen te houdene die int dorp wonende sin ofte wonen sullen die hem an de parmentrie sullen gheneren vp also sulke mesdaet alst irna ghescreuen staet Wi ghebieden dat dat so wat kinde dat leren sal int ambacht dat sal gheuen x sol van siere leringhen ende ij iaer in sine leringhe sin ende dit ghelt sal de meester gheuen stappants alse de leerlinc beghint int ambacht te leerne ende de meester salt vort an den leerlinc nemen Ende van desen x sol sal hi gheuen v sol int ambacht ende v sol in onser vrouwen kerke te gane al daert scepenen goet sal dinken Vort ghebiede wi dat de meester mach sin kint omme niet leren Ende scnapen kint mach om v sol leren ende die te gheuene ende te gane in auenant ghelijc den ghelde van andren leerlinghen Vort verbiede wi allen den cnapen die int dorp wonen ofte wonen sullen die voer meester sin bestaet dat si neghene vel werken die hars selues sin ofte hiemens sonder hars meesters daer si mede bestaet sin diese wrouchte hi soude wesen in demesdaet van xx sol dat i derdendeel van den xx sol sheren bouf ende dander derdendeel int ambacht ende terde derdendeel in onser vrouwen kerke ende te gheuene al dart scepenen goet sal dinken Vort verbiede wi bede meesters ende cnapen ende kindren ende allen den ghenen die hem an de parmentrie gheneren bede oude werch ende niewe bi lichte te werkene vp de mesdaet van xx sol dat i derdendeel den here dander derdendeel int ambacht ende terde derdendeel in onser vrouwen kerke te gheuene dart scepenen goet sal dinken Sonder caproene te voederne vel te droghene vel vp te slane vel in de bete te doene ende vel te beslane dit machmen doen sonder mesdaet ieghen hiemene Vort ghebiede wi dat so wie so de vinders wederseghet dat hi verbort v sol Vort ghebiede wi dat so wie so te orconden niet ne comt alse de here ende de vinders dinghen willen behouden dien dat hi wert gheboden te orconscepen te commene met sheren cnape ende met i vindre dat hi verbort xij d ieghen den here vort verbiede wi dat niemen scapine velle sette met lammerinen vp de mesdaet van xx sol ende tvoedersle verbort te wesene dart an stonde Dese ghebode ende dese verbode ghebiede wi hem allen te houdene die int dorp wonen ende hem an de parmentrie sullen gheneren vp also sulke mesdaet alst ir vorseit es ende dese pointe sin ghecort ghecort bi den here ende bi scepenen van sente pieters ende sii sullen gheduren also langhe alst den here ende scepenen goet sal dinken
</main>
<end>
Ende dese letteren waren Ghemaect int Jaer van den incarnatione ons heren dat men scrift M CC lxxx Sondaghes voer alre heleghen dach
</end>