Compilatiecorpus Historisch Nederlands 1.0 (CHN): ambtelijke teksten 1250-1800: gent_1280_2

<begin>
Wij de broedre ende de sustre Ende alle die miesters sijn van den gasthuse te ghent Maken cont ende doen te wetene alle den ghenen die nu sijn ende die hir na wesen sullen
</begin>
<main>
Dat ons der boidin vten houe die ser boidins soene was vten houe die poertre was toete ghent ende vro lisbetten sins wiues bewijsde te gheuene xv lib peneghe ende die hons wel vergolden sijn dar wij mede cochten xxx s elcs iars wel ligghende in goeden herue in honse goet dat wi ebben in samslact Ende die waren hons ghegheuen jn derre manieren Dat wij die miesterigghen ende miesters sin ende alle die na hons commen van den gasthuse te ghent sijn sculdech ewelike elcs iars te doen houdene des voerseits ser boidins iarghetide vten houe vp den vierden dach na honser vrouwen dach in spelmaende ende doen singhen vighelien ende sielmesse houer sine siele ende gheuen elken van honsen priestren vi d ende den coster iii d Ende wi sullen oec gheuen vp den seluen dach x s al honsen sieken ende honsen sustren ende honsen broedren te petansen ende te wine Ende vort sullen wi oec gheuen ewelike elcs iars al den iacominen te ghent xv s te petansen ende te wine vp den seluen dach Jn derre manieren dat sij oec sullen singhen vighelien ende sielmesse ende bidden houer des vorseits ser boidins ziele vten houe ende houer alle sijre vriende siele Ende dese vorwoerde es ghemaect omme de orboere van honsen hus ende omme de nutsceep van der siele bi alle den ghenen die miestersceep ebben int gasthus te ghent
</main>
<end>
Ende omme alle dese dinghe vaste ende ghestade ewelike te houdene sonder eeneghen scamp ende alsoe te wldoene alst hijr vorseit es ende bescreuen soe hebben wi dese lettren beseghelt met honsen seghele van honsen godshuse jn orconscepen Dese lettren waren ghemaect ende ghegheuen jnt van den jncarnatione hons heren ihesus kerst MCC ende lxxx iar omtrent alf marte
</end>