Compilatiecorpus Historisch Nederlands 1.0 (CHN): ambtelijke teksten 1250-1800: gent_1280_3

<begin>
Het si cont alle den ghenen die dese letteren sulen sien ende horen lesen
</begin>
<main>
Dat die vanden ghasthuse in ghent hebben ontfaen i cort ghemet lants bider mate gheleuert in eghendoeme in zaemslacht ther hiden in dockinpolre an de sujt side den groedepit van sente ians huse in ghent iaerlijc om xi s bouen allen coste diere vp ghaet van dikene ende van wat ongheualle dat mochte gheschien vander ze iaerlijc in sente baues daghe the gheldene Dit ghelt gheloue wi the gheldene hier in ghent the haren hues Dit lant es ons ghegheuen tenen erfleken pachte Ende moghenre mede doen al onsen wille sonder the behusene Ende ewelike moete wijt houden ploech ghehinghe Ende waer dat sake dat wi dese vorwaerde niet ne hilden So ware die pacht the nieute Ende soe moeste wi sente ians hues weder doen op dit selue lant also groet alset hier vore gheseit es Dit hebbe wi ghedaen bi onsen mesterscepe den haer boidene saer gherains sone om de nutscepe van onsen hues
</main>
<end>
Ende om dat wi willen dat al dese vorwaerde si ghestade also ghelijc alse hier staet bescreuen so hebbe wi dese lettere gheseghelt metten seghele van onsen hues Dese vorwaerde was ghemaect alse dat incarnacion ons heren was m cc lxxx in de maent van aprille
</end>