Compilatiecorpus Historisch Nederlands 1.0 (CHN): ambtelijke teksten 1250-1800: gent_1280_7

<begin>
Jn godes name si hem allen cont die dese lettren sullen oeren lesen
</begin>
<main>
dat ioncvrouwe mergrite broder gilis bardekins nichte ende ioncvrouwe jote van alst procurerighen van den heleghen gheest van sente lisbetten the ghent hebben ontfaen x lib vlamscher peneghe van ver volquiven ser Godeverts rabaus wijf was hewelike rente mede the coepene metten welken peneghen die vorseit sin hebbe wi ghecocht xx sol vlamscher penghe heweliker renten die men sal nemen van den lande dat ghechot was iheghen segheren den smet dat lighende es inde prochie van sleidinghen inde stede die men heet wesscure daer die voerseide x lib anne gheleit waren Dese voerseide xx sol ghelovewi the delene elkes tsiaers ewelike over ver volquiven ziele die voerseit es ende ouer aer alre vriende ziele gheliker wijs dat wi pleghen den armen the delene die woenende sijn int voerseide hof hir toe binde wi ons ende hem allen die na ons comende siin die dienen sullen inden voerseiden heleghen gheest
</main>
<end>
dat dit hebbe cracht soe hebbe wi dit gheseghelt metten segle van den houe ende met onsen propren segle Dit was ghedaen alst carnatioen liep up mcclxxix jn laumaent
</end>