Compilatiecorpus Historisch Nederlands 1.0 (CHN): ambtelijke teksten 1250-1800: gent_1280_8

<begin>
Jc suster agnete abedesse vander haeghe ende alt couent maken cont alle den ghenen die nu sijn ende hier nae wesen sullen
</begin>
<main>
dat ver natalie de vrouwe van muschebroec gaf in aelmoessenen tuschen tualef bunre lants ende dertienen ten cloestere vander haeghe met harre dochter kindren isabelen ende marien die begheuen sijn in onsen cloester dat leghet in de prochie van waesmonst[r]e ende van belsele ter stede dat heet ter vaerent Dwelke lant Min ioncvrouwe lisbette van zuaenewerue ghecreech de vrome te haren liue ieghen onsen cloester Jn derre manieren dat de vrome van desen lande soude gaen nae haere lijf tonser vestiarien scouuents bouf vander haeghe ende waer dat saeke dat men dat niet ne hilde soe soude tlant weder comen vp hoir Ende gheuiele dat de vorseide ysabeel ende marie trocken hier nae maels tanderen steden soe soude hem dat vorseide lant volghen ende sij souden hebben ende ontfaen alde vrome diere of quame
</main>
<end>
Jn orconscepe ende om vastnesse van desen sticken soe hebben wij dese lettre beseghelt met onsen seghele Ende dit heuet onse here de abt van bodeloe onse visiterre gheconsentert gheabprobert ende gheconfirmert ende daer omme soe heuet hi oec sinen seghel hier ane ghehanghen Dit was ghedaen int jaer vanden incarnatione ons heren m cc ende neghene ende seuentech sondaghes doet was sente mathis dach in sporcle
</end>