Compilatiecorpus Historisch Nederlands 1.0 (CHN): ambtelijke teksten 1250-1800: gent_1285_1

<begin>
Wi jan bi der ghenadecheden van onsen here abdt van sente pieters van ghent doen te wetene allen den ghenen die nv sin ende die irna commen sullen die dese letteren sullen zien ofte horen lesen
</begin>
<main>
dat men ene maniere van lande houdt van ons ende van onser kerken dat es gheeten lalant ende dat leght in onser vrouwen prochie sente marien dwelke lant onser kerken sculdech was elkes iars elc bunre enen penninch in palmesondaghe ende te alf meie elc bunre enen penninch ende in onser vrouwen daghe in aluen oeste elc bunre tuee sol ende de drie bunre drie peninghe ende enen allinc vp den seluen dach ende elke drie bunre enen madere in den oest ende in sente matheus daghe elke tuee bunre een spent halster euenen ende in sente symoens ende iuds daghe elc bunre ene virtale rogs ende in sente Nyclaus daghe elc bunre een halster mouts ende tuee peninghe van elken halster mouts te makene Waer bi dat ons dochte ende den ghenen die dat lant audende sin dat vele pine an die rente te verdinghene lach elkes iars bidi dat menegherande scult sculdech was ghelijc dat ir vorseit es ende te vele terminen te gheldene So dat wi ouerheen ebben ghedreghen met onsen scepenen van sente pieters dorpe ende metten laten diet dlant audende sin ende om dat ons dinct de nutscep van onser kerken ende dien vorseiden scepenen ende laten de nutscep van hemlieden ebben si een verdinc ghemaect ieghen ons van diere vorseider renten ewelike staende elc bunre om zees scelinghe ende om zees peninghe vlaemsche elkes iars te gheldene in sente Nyclaus daghe ofte binnen derden daghe daerna onse dienst buten ghelaten dien si ons sculdech sin elkes iars alse van der vetten hute onsen houe te voerne ende vp onse couteren te bredene te elken saisoene also alse de couteren gheleghen sin Vort es te verstane dat dat selue lant dat ir vorseit es blift ter seluer husagen ende ter seluer costumen van cope ende van sterfcope dat eft ghestaen tote hare Ware oec dat sake dat de vorseide late die dit vorseide lant audende sin niet ne golden de vorseide zees scelinghe ende zees peninghe van elken bunre ten termine die ir vorseit es ende wi der omme wilden doen panden so adde elc laet dier omme ghepant worde ende niet vergolden adde verbort zees peninghe [t]e scepenen coste bouf ende ter ghere bouf die met hem om de pandinghe ghinghen ofse scepenen nemen wilden Vort es te wetene alle dese vorworde die ir vorseit es dat soe was ghemaect bi onsen wille ende bi der late wille die dlant audende sin ende bi scepenen vonnesse van sente pieters dorpe die wisden de vorworde ewelike vast ende ghestade te bliuene dat es te wetene der heinric de yserine heinric de scotelere jan ver marthen sone iustaes van bertenghem willem van donse euerard van der pale robe van hadenghem woitin de moer iustaes van den hede ywein van velseke woitin sondersorghe woitin van merlebeke ende jan veis
</main>
<end>
Ende om dat wi willen dat dese vorseide vorworde bliue ewelike vast ende ghestade gheauden ebbe wi dese letteren vthanghende gheseghelt met onsen seghele ende wi scepenen vorseit van sente pieters dorpe om dat wi willen dat dit verdinc ewelike vast ende ghestade bliue dat ghedaen was bi der late wille ende bi onsen vonnesse ghelijc dat ir vorseit es ebbe wi dese letteren vthanghende gheseghelt met onsen seghelen Die waren ghegheuen int iaer van den incarnatione ons heren datmen scrift Millesimo Ducentesimo Octuagesimo quarto Saterdaghs voer sente vincencis dach
</end>