Compilatiecorpus Historisch Nederlands 1.0 (CHN): ambtelijke teksten 1250-1800: gent_1285_2

<begin>
Jc Rase here van Gauere ende Jc Beatris seren wijf van Gauere Ende Jc Jan busere van Basseuelde doen te verstane alle den ghenen die dese lettren sullen zien ofte horen
</begin>
<main>
dat de Abdesse van der Biloken ende Couent van der seluer stede van der Ordinen van Cysteaus bi Ghent hebben ghenoech ghedaen van onsen rechte dat wi sculdech waren te hebbene van hem alse van onsen beride ende van hute blasene van der woustine de welke heet langhemate ende van den xi buunren de welke der an ligghen an de vorseide langhemate ende de welke si ghecreghen ieghen onser vrouwen ver Mergrieten die graefnede was van vlaendren ende van Henegouwen ende dese langhemate ende dese vorseide xi buunre ligghen zuutwaert vor de wonincghe de welke behoert ter Abdien van loes
</main>
<end>
Ende omme zekerhede ende aquitanse van onsen rechte dat si ons sculdech waren so hebbe ic Rase here van Gauere ende Jc Beatriis des vorseits heren wijf van Gauere Ende Jc Jan de busere van Basseuelde daen scriuen dese lettren ende daen zeghelen met onsen zeghelen ende dit was ghedaen in den tijt dat men scrijft Carnation ons heren M CC Lxxxv Sfrindaechs na de Triniteit doen
</end>