Compilatiecorpus Historisch Nederlands 1.0 (CHN): ambtelijke teksten 1250-1800: gent_1286_1

<begin>
Wij scepenen van ghent der Godeuert ser ydiers soene der jordaen buec der jan ser jans soene ser sanders soene der heinriic haec der willem ser wasselins soene mathis van sente baues ende der volker ver margrieten soene maken cont alle den ghenen die dese lettren sullen sien ende horen lesen
</begin>
<main>
dat wii daer ouer waren alse scepenen daer ver kateline ser philips masch wiif was vp gaf in allen heghindoume der mesterigghen van den gasthuse van ghent ten vorseiden gasthuse bouf de hofstede daer de cousemakere vp woent vor giselbrechts gruters die leghet naest ydier pots die ghelt xxx s siaers ende iiij capoene ende deene heleft vander hofsteden daer ydier pots stal vp staet die ghelt xv s siaers deene heleft Ende hier toe dede ver kateline de wet vander port ende al dat soe sculdech was te doene om hare hier af tontheeruene ende de vorseide mesterigghe der jn te heeruene Vort soe heuet soe ghegheuen den vorseiden gasthuse xxx lib vlaemscer peneghe in ghereden ghelde om te coepene drie lib wart renten siaers Van der welker vorseider renten die vanden gasthuse sullen gheuen elken zieken int gasthus euwelike eene pinte meets elkes vrindaghes Waer dat saeke dat siis niet ne daeden ende sii dese vorewarden niet ne hilden dat sii verbueren souden dese vorseide rente gheheliic ende al jeghen den heleghen gheest van sente michiels ende jeghen tspitael vander biloken ende dies soude hebben de heleghe gheest van sente michiels deene heleft ende tspitael vander biloken dander heleft
</main>
<end>
Ende omme dat wii willen dat dit sii vaste ghehouden ende ghestaede ende dat de meester no de mesterigghe vanden vorseiden hues no niemen van harent haluen nemmermeer der jeghen ne moghen gaen bi eneghen engiene soe hebben wij in orconscepe van desen vorseiden sticken ende bi den versouke vander vorseider vrouwen dese lettren daen bescriuen ende beseghelen met onsen conterseele vander stede Dese lettren waren ghemact ende dese ghifte ghegheuen jnt jaer vanden incarnatione ons heren doe men screef mcc vierewaruen tuintech ende sesse saterdaghes nae sente amelberghen dach jn hoiemant
</end>