Compilatiecorpus Historisch Nederlands 1.0 (CHN): ambtelijke teksten 1250-1800: gent_1286_2

<begin>
Alle den ghonen die dese ieghenwordighe lettren sullen sien of horen lesen
</begin>
<main>
Jc zuster auezoete sere willems dochter van der amede wilen begghine wonende in de hoye te ghent Saluut in onsen here Jhesu kerst Jc wille dat allen lieden die nu sijn of comen sullen hier na kenlic si ende openbare dat ic wel vorpenst ende beraden ende bi minen vrien wille hebbe ghegheuen ende gheue ouer mine ziele ende mijns vader ende mire moeder ende der ghore daer ic of comen bem in rechten eghindoeme der abdessen ende den zustren van sente claren van ghent al dat ghoet dat ic hebbe in de warelt waer dat leghet ende waer dat mi gheuallet weder so het si eruelike rente of rente te minen liue ende in wat andren sticken daert an leghet of mi gheuallet dese ghifte ewelike te ghedurne sonder macht van minen haluen te wederroepene alse langhe alse die zustre of die na hem comen wonen te ghent of der omtrent ende si werken biden rade uan der ordine van den freremineurs Gheuiele dat dat die zustre vorenghenoemt bi node of omme ander zaken treckeden weder te brugghe of te ypre of in enighen andren closter uan der ordine van sente claren die stonde uan ghent of uan daer ommetrent na der broedre dinkene vorenghenoemt of schieden van den rade uan den broeders uan der ordine uan den freremineurs so willic dat mijn ghoet waer dat ment vint ligghende of alse groot ghoet na dat den broeders vorengheseit redenlic dinct ende gheuoeghe gheuiele dat die abdesse ende de zustre mijn ghoet dat ic brochte in den clooster uercochten of anders hare orbare der mede daden wederkeerde up mine gherechte aldinghers Uoort so willic dat mijn ghoet alle tijt ghebonden si als uaste als het te voren was eer dat ict up gaf te minen restore gheuielt dat men up mi bi redenliker proeue enich onrecht hier na betoghen mochte of up minen vader of up mine moeder Ende om dat ic alle dinghe wille ende beghere te vuldoene die daer toe moghen helpen dat dese ghifte also alsoe vorseit es ewelike sonder enich wederroepen vast bliue ende ghestade so ghelouic met gherechter trouwen der abdessen van sente claren van ghent ende den zustren wanneer dat die abdesse ende die zustre willen bider broeders rade van der ordine uan den freremineurs te comene voor elke wet in de welke dat mijn ghoet leghet bi sufficianten persone die vulle macht heeft van mi alle dinc te doene dat ter wet behoort of bi mijns selues persone wardets noot ende daer ute te ghane uan desen ghoede ende de abdesse ende de zustre der in te doene na alle dinc dat wet wijst ende redenlike costumen houden Voort dochte der abdessen ende den zustren vorenghenoemt bi rade die si hadden dat ic enighe dinghe hiernamaels me der toe doen mochte dan hier vorseit es als uan desen ghoede dat vorenghenoemt es ute te ghane ende die abdesse ende de zustre der in te doene daer in ghelouic met ghoeder trouwen te doene wat dat mi de broeders uan der ordine uan den freremineurs sullen raden Ende jc gheloue met ghoeder trouwen ieghen dese ghifte nemmerme te doene no bi mi seluen no bi andre persone ende ic doe mi buten ende vertie alre exceptie alre priuilegie nu ghegheuen of hier na nu ghecreghen of hier na ende alles rechts gheestelics of warelics ende alles rechts dat men hout bi ghewoenten biden welken dat dese ghifte of enighe dinghe die hier ghescreuen sijn mochten warden ghelet of tebroken Dit was ghedaen in de ieghenwordichede broeder volkers des custoden van vlaendren broeder jans coopmans des Gardijns van ypre broeder heinrics wissen des Gardijns van ghent broeder wederics broeder boidijns van oostburgh broeder Niclais van der lake der abdessen uan sente claren uan ghent ende al haers conuents ser Godeuerts uten houe jacob baiarts
</main>
<end>
Ende omme dat ic als de ghene die vulle macht hadde up mijn ghoet in de tijt derre ghichte wille dat dese ghifte also als uorseit es ewelike vast bliue ende ghestade so hebbic dese lettre bezeghelt met minen zeghele uuthanghende ende hebbe ghebeden ghoeden lieden ende vroeden broeder volkeren den custode uan vlaendren broeder janne den Gardijn van ypre visiteerre uan den zustren van sinte claren van ypre ende van brugghe broeder heinrike den gardijn van ghent den here Godeuerde uten houe minen zuagher jacob baiarde dat si dese lettre met mi hebben bezeghelt Jc approbere ende wille dat daer bouen ghescreuen es of up minen vader Dese lettre was ghegheuen up sinte Benedictus auonde jnt jaer ons heren als men scrijft Dusent Tuehondert viue ende tachtentich
</end>