Compilatiecorpus Historisch Nederlands 1.0 (CHN): ambtelijke teksten 1250-1800: gent_1287_1

<begin>
Jc jan lauwart bailliu van ghent make cont alle den ghenen die dese lettren sullen sien ende horen lesen
</begin>
<main>
dat ic hebbe gheset in mine stede meester woutre brusche van ghent in den waterganc die ghaet van ghent ten damme warts ende in deeruenesse ende in al dien dat daer toe behoert Ende damme te verslane ende te rumene ende te stoppene ende tonstoppene ende [t]lant te verhurne dat ter toebehoert ende te doene al dat ten [v]orseiden waterganghe toebehoert Ende gheue hem macht in dit werch ende in desen waterganc van allen sticken ghelijc mi seluen ende wie soe eneghe sticke jeghen hem dade ofte seide dat hijt dade alse jeghen den ghenen die es in mine stede
</main>
<end>
Jn orconscepe van desen sticken soe hebbe ic hem ghegheuen dese lettren beseghelt met minen propren seghele Die waren ghegheuen int jaer ons heren m cc iiiixx ende seuene sondaghes vor sente marcs dach
</end>