Compilatiecorpus Historisch Nederlands 1.0 (CHN): ambtelijke teksten 1250-1800: gent_1289_1

<begin>
Allen den ghenen die dese Lettren sullen zien ende horen
</begin>
<main>
Meester Symoen Talboem Willem van den Pitte Prochipapen van Sente Michiels te Ghent Ghiselbrecht van Varnewike Capellaen van sente Niclaus vander seluer stede ende Jhan Capellaen van sente Obbrechts in Port hackere neffens die voerseide stede van Ghent saluud ende wareide te verstane Wie doen v allen te wetene ende elken dat Diederic die men hetet Labaen ghesont van sinen Lechame ende wel bedacht van sinne ende van sire vroescepen ende omme die salichede van sire zilen ende omme ewelike bede diemen doen sal ouer sine zile ende in verlanesse van sinen sonden gaf vp voer ons Denaer Pietren vten Houe alse prouisoer ende voersire van den huse van sente Obbrechts van Port hackere alse den armen Begghinen boef vander seluer stede die daer wonende sijn ende sullen wonen in rechter aelmosine de husinghen die hir na staen ghescreuen dat es te verstane die husinghe die staen onder Barghen in die prochie van sente Michiels van Ghent de welke staen ende strecken hem vander straten voren die men hetet onder Barghen tote bachten vp die Leye daer bewilen woenden die Becharde ende die husinghe daer hi in wonede die staen bi Port hackere vp die gracht ende thuus daer men in weuet dat staet vp die selue gracht te Port hackere waert ende alle die husinghen die daer staen vp ser Pieters vos Lant daer hi recht ane heuet ende al dat recht dat hi heuet of hebben mochte ane die husinghe die staen in Port hackere na sijn lijf ende na hare beder lijf Diederics ende ser Pieters lijf so sal die Meestrigghe van Port hackere so wie so soe wesen sal ewelike ende arvelike vrilike ende Paesiwelike houdende sijn ende besittende als ten voerseiden armen Begghinen boef ende harlieder orbore ende hare bate mede te doene Voert heuet Diederic voer ons belouet bi sekerheden ende bi sinen ede dat hi dese voerseide ghifte also langhe als hi leuet sal vast houden ende ghestade ende dat hi nemmerme bi hem of te bi andren personen dar jeghen comen sal of enighe kalaenge vp te doene ende sonder enich weder ropen Hir bouen so heuet die selue Diederic gherenonchierd voer ons bi sekerhede ende bi ede die voerseit sijn Excepsien van boseiden ende van beduanghe ende alle excepsien die dien voerseiden Diederike in enighe maniren jeghen dese voerseide ghifte mochten helpen ende staen te staden ende dien voerseiden hare Pietren ende na sijn lijf den voerseiden huse van Port hackere soude in enichghere maniren moghen daren ende alle redenen ende alle betoghenesse ende alle bescarnesse biden welken dat die voerseide Diederic bi hem jof te bi elhiemene mochte comen jeghen dese voerseide ghifte ende jeghen dese jeghewoerdeghe lettren ende jeghen die poente die hir staen in ghescreuen ende dese voerseide Diederic heuet ghesuoren ende voer ons belouet bi sinen ede die hi daer vp ghesuoren heuet dat hi alle dese poente die hir voren staen ghescreuen ende elc van desen poenten ghetrouwelike ende onbreckelike ende ghehelike ende al sal houden vaste ende ghestade ende nemmerme daer jeghen te sprekene of jet ieghen te doene ende
</main>
<end>
jn orconscepen van al desen ende bi des voerseids Diederics bede ende bi sinen versoeke so hebben wi dese jeghewoerdeghe lettren met onsen seglen beseghelt Dit was ghedaen int jaer dat men scrijft Jncarnatioen ons heren Ducent Tuehondert ende Neghentich Smaendaghes na sente Mathijs dach apostele ons here
</end>