Compilatiecorpus Historisch Nederlands 1.0 (CHN): ambtelijke teksten 1250-1800: gent_1291_1

<begin>
Het si cont allen den ghenen die desen brief sullen sien ende horen lesen
</begin>
<main>
Dat ic Lisebette abdesse van der Byloken biden consente van minen conuente hebbe verhuurt der Meesteriche van den spittale van portackre Ende den prouisoerres van der seluer stede Sestich roeden lands ligghende andie nordside van haerre Capellen lettel me of the min metten beuanghe van den mure omme virtich scaeleghe jaers the half marte te gheldene also langhe als dat voerseide spetael staet indire vsagen ende indire maniren als den armen ende den cranken begghinen boef ende ware oec dat sake dat dat voerseide spetael worde verwandelt in ander maniren ende in andren vsagen dan ten voerseiden armen ende ten cranken begghinen jn te houdene of dat deen pacht den andren achterhaelde So soudic voerseide abdesse ende mijn conuent an[e]vaerden onse voerseide land sonder enighe kalaenge ende sonder bate te doene van dien datter vp staet
</main>
<end>
Ende omme dat dese voerseide vorewaerde vast sal wesen ende ghestade so hebbic voerseide abdesse dese jeghewoerdeghe lettren bezeghelt met minen zeghele ende die voerseide meestriche van dien voers[ei]de spetale met haren zeghele Dit was ghedaen jnt jaer van den jncarnatione ons heren dat men screef Dusentich Tuehondert Een ende Neghentich Binder maent van marte
</end>