Compilatiecorpus Historisch Nederlands 1.0 (CHN): ambtelijke teksten 1250-1800: gent_1291_2

<begin>
Weten alle de ghenen die dese lettre sullen sien ende die te comene siin
</begin>
<main>
Dat jc Eeustaes van leeden heeschende was vp tiit die leden es Der abdesse ende den Couente van sente Claren in Guldemersch bi Ghent tiende van den vorseiden guldemersch dar de vorseide abdesse ende tcouent haren cloester vp ghesticht hebben van den welken heesche ende van den welken tiende de vorseide abdesse ende tcouent haren paies ieghen mi ghemaect hebben ende mi ghenoech ghedaen ende wel verghouden warbi dat ic hebbe al den vorseiden heesche ende tiende quite ghescouden ende al dat recht dat ic hadde ane de vorseide guldemersch ofte hebben mochte Dat es te verstane al dat recht dat ic hadde ane de vorseide guldemersch tote vij ghemeten groet lettel min ofte lettel meer sonder strepkin dat alise ysembarts houd ende hare ghedeele Ouer dese vorseide dinghen waren alse orconde ywain stullart bailliu van Ghent ende van den lande van aalst arnout brantin ende Gillis pape coster van voerde Ende vort ouer dese vorseide dinghen waren als ons heren sabbets manne van sente pieters Gherart van den walle ende diederic de scotelere Ende dese vorseide Gherart van den walle ende diederic de scotelere vore gheseit hebben alle dese vorseide dinghen kenlic ghemaect Roeline zichtboeme heinrike den moutenare Ghizelbrechte volkers soene ver marien soene Boudwine arnouts soene ende martine den drussate alse hus ghenoete die oec sin manne ons here sabbets van sente pieters
</main>
<end>
Ende omme dat ic wille dat alle dese vorseide dinghe wel ende wettelike ewelike staende bliuen sonder calanghe van mi ende die na mi comen sullen so hebbic dese ieghewordech lettre ghesegelt met minen propren seghelen in orconscep der waride vort so biddic alle de orconde ende de manne vore ghenomt die seghelen hebben dat siit alle seghelen Ende wi ywain stullart vore gheseit arnout brantin ende gillis pape coster van voerde om dat ons alle de vorseide dinghen wel kenlec siin so hebbwire ane onse propre seghelen ghehanghen in orconscepe Ende wi Ghierart van den walle vore ghenoemt Diederic de scotelere Roelin zichtboem heinric de moutenere Ghiselbrecht volkers soene ver marie soene Boudwin arnouts soene ende Martin de drussate om dat ons alle dese vorseide dinghe wel ende wetteleke kenlec sin so hebwire onse seghelen ane ghehanghen in kenlichede der warede Dit was ghedaen in iaer ons here mcc Neghentech sdisendags na sente Gregoris dach
</end>