Compilatiecorpus Historisch Nederlands 1.0 (CHN): ambtelijke teksten 1250-1800: gent_1291_3

<begin>
[H]et si cond Jn de name sfader ende tsoens ende tselechsgheest amen Allen den ghenen die nv sijn ende werden sullen ende die dese lettren sullen sien ofte lesen ende horen lesen
</begin>
<main>
Dat jc Segher vten dale ende aeghte mijn wettelic wijf die wonende sijn jn die cuperstrate jn sborgrauen gherechte van ghent jnt tbischobdoem van dornike wel bedacht wel vorsien ende wel vorpenst van al onsen redenen ende machtich van al onsen sinnen om de minne van Gode onsen here ende om die salichede van onsen sielen ende jn oflate van al onsen sonden ons vader onser moeder ende al onser vrienden Jn de here ons heren van hemelrike die dor onsen wille staerf ende sire werdeliker moeder der maghet sente marien ende sgroets sente Jacobs ende allen goeds heleghen ouer mi ende mijn wijf stichte ende make sette ende ordinere ene capelrie van vijftiene ponden parisisen helkes jaers hewelike staende na onser thuier lijf ende te besinghene jn miins heren sente jacobs huus vp tniewe lant dat staet nordwart huut van ghent al vaste an ghent jnt tbischob doem van dornike dar wi bede Guldebroeders sijn jn tgulde mijns heren Sente Jacobs van galissien jn compostelle behouden dien dat jc sal gheuen die heerste ghifte ofte aeghte mijn wijf welc hare onser langher leeft van ons beden wien dat wise willen gheuen War oec dat sake dat wi verroekeloesden ofte ouer een niet ne consten ghedraghen dese vorseide ghifte te gheuene binnen onser thuier liue Soe wil wi ende ordineren thonsen hutersten wille datse gheue der philips vten dale die een es van den xxxix van ghent ende ghebrake oec an hem so wilwi ende consenteren in philips ser philips sone vten dale diere vorseid es dat hise gheue ouer ons ende in onse name ende dat es emmer te verstane na onser thuier lijf Vort wilwi ende ordineren bede jc ende mijn wijf dat die capellaen diere singhen sal in dese vorseide capelrie alle daghe singhe als hijs ghestaed es het ne dade kenlike noet sake ende alle sondaghe ende mesdaghe ouer ons ter poyhen bidde ende doen bidden den goeden lieden diere te messen comen sullen ende alle maendaghe ene siele messe lese ende speciaellike vp den dach dat men onse jaerghetide sal doen vigilien sauonds segghe commendatien ende messe bi noten Requiem Ende dese messe wilwi dat mense segghe betide om der armer liede wille die betide moeten gaen te haren werke die rente die wi gheuen bede jc ende miin wijf te deser vorseider capelrien die bewijswi in desen steden die hier na volghen die heerste rente van deser vorseider capelrien die bewijs wi ende verclaren drie pont vlaemsche vp drie hofsteden deene hofstede es dar wij vp den dach van heden wonen vp in de cuperstrate jn sborgrauen gherechte van ghent ende dander tue hofsteden ligghen al vaste an dese vorseide hofstede in die selue side ende jn die selue strate jn tselue gherechte hoestwart woch streckende tote vp die gracht viere pond vlaemsche vp die hofstede dar Symoen labaen vp woende ende heuet ghehuust in die drapstrate binnen der port van ghent tnaeste huus lourin halins an die west side van der straten viere ende dartich sceleghe vlaemsche vp ene hofstede dar Gillis ver nalien sone woent ende heeft ghehuust buten torre jn die noert side van der straten jn sborgrauen gherechte van ghent sestien schellinghe ende acht penninghe vlaemsche vp ene hofstede die leeght jn die peperstrate an die hoest side van der straten dar dhoude lambrecht en huus vp heeft staende jn sborgrauen gherechte van ghent tuintich scellinghe vlaemsche vp ene hofstede die leeght vp die scupgraght in sborchgrauen gherechte van ghent dar ghiselin vinke vp woent ende jan van haelst vort van alsoe vele alser ghebreect van vijftien ponden van deser vorseider renten te deser vorseider capelrien boef So wilwi penninghe legghen onder die dekenen van Sente jacobs huus datter vorseid es alsoe vele dessi die rente moghen wulcoepen ter capelrien boef waer dat si selue willen dat es te verstane waer dat sake dat wi selue dese vorseide rente niet ne cochten binnen onsen liue of die een van ons beden diere lancst leeft tote vijftiene ponden wel wulcomende so souden wi desen vorseiden dekenen leueren dese vorseide penninghen dese vorseide rente mede te copene die vijftiene ponden mede te wulcomene War oec dat sake dat dese vorseide penninghe dar men dese vorseide vijftiene ponde mede soude wulbringhen te gheuene binnen onser thuier liue bi fauten van ons beeden of deen van ons beden die lancst leeft So obligeren wi al dat goed dat na onse doet bliuen sal waer dat leeght ende waer dat ment vinden mach huus ende herue ende land moebel sciipgraght ende onmoebel ter vorseider dekenen boef ende gheuent hem vp clarlike ende al ende so vele dar of te nemene dat dese vorseide vijftine ponde in goeder renten sijn ghecocht ende wuldaen Vort so wilwi ende ordineren beede jc ende mijn wijf dat dese vorseide dekenen van sente jacobs huus vp tniewe land beede die nv sijn ende hier na comen sullen dese vorseide rente ontfaen heewelike helkes jaers sonder eenighe calaenge van hiemene die nu leeft ofte hier na leuen mach elc in sijn jaer na dien dat mense kiest van jare te jare als ter capelrien boef die vorseit es ende die rente leueren den capelaen diere singhen sal na onser thuier doet ende wiltijd dat wi beede doet sijn beede Jc ende mijn wijf Soe willen Jc ende mijn wijf dat men dese vorseide capelrie besinghe ende dat die capelaen hebbe die rente ende niet heer ende alsoe langhe als wi beede sullen leuen so sullen wi dese vorseide rente heffen ende niet langher ofte wie soe lancst leeft van ons beeden ende bliuet onghehuwet ende si dat sake dat hi huwet diere lancst sal leuen van ons beeden soe gaet stappants Jnne die capelrie ende dar na soe ga die rente alsoe alser vorseit es Es oec dat sake dat dese vorseide dekenen dese vorseide capelrie niet nen doen besinghen den capelaen diese hebben sal na de ordinance die wi hebben gheordinert ende hem letten willen jn sine Neringhe te comene ende si hem ontsegghen sine rente te gheuene na die vorme van deser vorseider ordinantie ofte hem niet ne willen bewisen die rente war hise nemen mach ende selue ontfaen mach want es dat sake dat si den capelaen bewisen dese rente selue te ontfane om hemleden te ontlastene soe scheldwise quite die rente te ontfane dese vorseide dekenen Es dat sake dat sijt niet ne doen ende dese vorseide ordinancie niet ne houden Soe hebben si ons ghelouet eene kennesse te gheuene vten houe van dornike de welke kennesse houden sal dat mene manen mach dese vorseide ordinantie te houdene clarlike ende al vp de peine van verwatenessen en daeden sijs niet ne ne hilden ende mense daer of calengieren mochte ende het kenlic ware ende openbaer van den mijnsten pointe datter in staet jn dien dats hem die vorseide capelaen beclaghende ware tenden seuen daghen na die maninghe sal mense moghen verwaten hier toe so hebben si alle die dekenen beede houde ende niewe haren consent ghedaen als openbar es ende kenlic bi hare selfs seglen ende bi haren ghemeenen segle van mijns heren sente jacobs huus datter vorseid es die si in kennessen van deser vorseider ordinancie an desen tsarter hebben ghehanghen Jn dese vorseide verwannesse die men mach verniewen ende aggraueren als te doene es sal mense houden tote ander stont dat si clarlike ende wulmaekelike dese vorseide ordinancie hebben wuldaen war bi dat mense mach calengieren met rechte ende met redenen van den ghenen diese sculdich es te calengierne ende te begripene van desen pointen Ende om dat wi willen beede jc ende mijn wijf dat dese ghifte ende dese vorseide ordinancie vast bliue ende ghestade ne ghewisselt ne ghekeert na onse ordinancie die wi jn desen tsartre hebben gheordineert ende oec om dat onse huterste wille nu es ende bliuen sal tote in onser thuier doet bi der gratien van onsen here ende jn desen wille willen steruen Soe bidden wi hoemoedelike onsen here den abt van sente baues te ghent die persoen wert van deser vorseider capelrien dat hi hier toe doe sinen consent ende sine hulpe om die minne van gode dat dese capelrie wulcome jn deser maniere dat wi hebben gheordineert ende jn orconden van sinen consente sinen seghel der an anghe behouden allen rechte ende helken man Houer dese vorseide ghifte ende ordinancie So waren mijn heren die borchgraue van ghent die proefst van sente verelden van ghent die deken van sente verelden van ghent die deken van den kerstinede van ghent der woutre van corterike prochipape ende canonec van sente verelden van ghent ende die prochipape van shelechskerst van ghent jn wies prochie dese capelrie wert verdient der willem vten dale mijn broeder der philips vten dale ende philips sijn sone alle die dekenen van sente jacobs huus vp tnieweland datter vorseid es daer men dese vorseide capelrie verdienen sal heewelike alse langhe alse dese werelt sal staen beede die houde dekenen ende die niewe der jan van biervliet die nu capelaen es in tselue huus dar dese niewe capelrie werd verdient ende hebben alle hare seglen an desen tsartre ghehanghen jn orcontscepen van deser vorseider ghiften ende ordinancien metten groten seghele die boert der ghemeenter van sente jacobs huus vp tniewe land datter vorseid es
</main>
<end>
Dese ghifte ende dese ordinancie was ghemaect jnt jar ons heren als men screef dusentich tue hondert vierewarwen tuintich ende elleve sdonresdaeghs voer onser vrouwen dach natiuiteit dat es als onse vrouwe sente marie was gheboren es
</end>