Compilatiecorpus Historisch Nederlands 1.0 (CHN): ambtelijke teksten 1250-1800: gent_1291_4

<begin>
Wi Jhan bi der gratie van gode abt van sente pieters doen te wetene alle den ghenen die dese lettren sullen sien ofte horen lesen
</begin>
<main>
Dat wi hieskende waren vp tiid die leden es Der abdesse ende den Couente van sente Claren in guldemersch bi Ghent tiende van den vorseiden guldemersche dar de vorseide abdesse ende couent haren cloester vp ghesticht hebben van den welke iesche ende van den welker tiende de vorseide abdesse ende tcouent haren paies wel ieghen ons ghemaect hebben ende thonse wille warbi dat wi hebben quite ghescouden den vorseiden heisch ende de vorseide tiende ende al dat recht dat wi hebben an de vorseide guldemersch ofte hebben mochten Dat es te verstane al dat recht dat wi an de vorseide guldemersch hebben tote vij ghemeten groet lettel min ofte lettel meer sonder strepkin dat alise ysembarts houdende es ende hare ghedeele Ende van desen vorseiden paise heeft de vorseide abdesse ende couent ons ghenoech ghedaen ende onsen goeden moet Ouer alle dese vorseide dinghe waren alse orconde ywain stullart bailliu van ghent ende van den lande van alst arnout brantin Ende Gillis pape coster van voerde Ende vort ouer dese vorseide dinghen waren alse onse mannen Ghierart van den walle Eustaes van leden ende diederic de scotelere Ende dese vorseide ghierart van den walle ende diederic de scotelere hebben alle dese vorseide dinghen wel ende wettelike kenlic ghemaect Roeline zichteboeme heinrike den moutenere Ghiselbrechte ser volkers sone ver marien soene boudwine arnouts soene ende Martine den drussate alse haren hus ghenoeten die oec onse man sin
</main>
<end>
Om dat wi willen dat alle dese vorseide dinghen wel ende wettelike staende bliuen sonder calanghe ewelike van ons ende van dien na ons comen sullen so bidden wi den vorseiden orconden ende den vorseide mannen die seghelen hebben dat siit alle seghelen Ende wi ywain stullart vorgheseit ende arnout brantin ende Gillis pape coster van voerde om dat ons alle dese vorseide dinghe wel kenlec sin so hebwi hier an onse propren seghelen ghehanghen ende wi Gherart van den walle vore gheseit Eustaes van leden diederic de scotelere Roelin zichtboem heinric de moutenere Ghiselbrecht ser volkers soene ver marien soene Boudwin arnouts soene ende martin de drussate om dat ons alle dese vorseide dinghe wel kenlec sin so hebwire onse seghelen an ghehanghen in orconscep der waride Dit was ghedaen int jaer ons here mcc negentech sdisendags na sent Gregoris dach
</end>