Compilatiecorpus Historisch Nederlands 1.0 (CHN): ambtelijke teksten 1250-1800: gent_1293_3

<begin>
Dit es tsegghen dat miin here Jan Briseteeste Woutre van den hamme Pieter de meier ende Hughe corthals vinders van den sticken die waren tusschen de Borchgraue van ghent ende der kerken van zente Baues zeiden int iaer ons heeren doe men screef mcc ende lxxxx ende iij up den zondach voer den ommeganc te Doernike
</begin>
<main>
Dat heerste point es dat de Borchgraue van ghent es schuldech te hebbene den derden penninc van allen sticken die gheuallen of gheuallen moeghen in de voghedie ieghen den abt van zente Baues Ende voert es schuldech te wesene de Borchgraue of dien hi zet te allen ghedinghen ende te allen sticken dat ter wetteleecheden toe behoert ende te allen sticken ende te allen bedriue dat valt tusschen den abt ende den Borchgraue in de voghedie zonder hiet buten te stekene up dat hire wesen wille Ende al ware oec dat zake datter de Borchgraue niet en ware no ziin seriant daer omme ne soudemen niet laten die ware in zabbets stede wet te doene behouden Sborchsgrauen rechte Ende ware oec dat zake dat iemen die ter voghedien behoerde hem beclaghede dat hem wet ghebrake dies heeft de borchgraue macht hem wet te doen hebbene alse voghet van dien datter voghedien behoert Voert so es schuldech te hebbene de Borchgraue de vischerie van Sborchgrauen brigghe toete Sleidinghen hulle ende voert toete SRoeden kinder ende el niet te dier stede Ende voert es schuldech de Borchgraue te hebbene de vischerie van Sborchgrauen brigghe toeter langher brigghen ende theerschep binnen den baermen van der graecht toete iij lib ende datter onder es ende de souerheinetheit ga al daer zoe schuldech es te gane Voert Daer men schepenen maket daer es schuldech de Borchgraue of ziin seriant te wesene ende te helpene nemen liede die ghoet ziin ende die nutteliic ziin daer toe bi rade van schepenen van der stede ende ware oec dat zake datter de Borchgraue niet en wilde ziin no ziin seriant daer omme ne zoude de abt niet laten of diere ware in zine stede hine zoude schepenen maken ende ne gheenen schepene machmen maken het en zi up wetteliken dinghe dach Voert es schuldech de heere te hebbene de liede ter wareden alse hiis beghert Voert alsemen herevaert ghebiet van sheeren haluen van den lande so esse schuldech te ghebiedene de scoutete bi heetene van den baeliu ende esse schuldech de baeliu te gheleedene toete zente Baues ende daer esse schuldech de Borchgraue of ziin seriant te nemene ende voert te gheleedene Ende also dese voerzeide sticken also verre voert alse ter voghedien behoert Ende viele oec zettinghe waert van hervaerde waert van zettinghen van so wat sticken dat ware daer ouer ware schuldech te wesene de Borchgraue of ziin seriant ende en wilde hiere oec niet wesen daer omme ne zoudemen niet laten voert te gane alse verre alse ter voghedien behoerde bi rade van schepenen
</main>
<end>
Ende om dat dit vinderscheep vast bliue ende ghestade zo hebbe wi Jan briseteeste riddere ouer ons ende ouer hughen Corthalse Ic woutre van den hamme ouer mi ende ouer Pietre den meier dese lettren gheseghelt met onsen zeglen Dit was ghedaen int iaer doe men screef dat incarnatioen ons heeren mcc ende lxxxxiii vp den zondach voer den ommeganc van Doernike
</end>