Compilatiecorpus Historisch Nederlands 1.0 (CHN): ambtelijke teksten 1250-1800: gent_1294_1

<begin>
Het si cont allen den ghenen die nv siin ende die te commene siin die dese lettren sullen zien ende horen lesen
</begin>
<main>
dat heinric moraet ende mergriete siin wettelike wijf quamen voer den her boidine van der lake profst van sente pieters van Ghent ende voer heinrike lenten woitine den moer janne den meiere van maelte woutren den smet jacoppe bolline janne van velseke woitine van merlebeke woitine sonder sorghe heinrike van hadenghem janne veise arnoude van den spiegelkine janne cnapeline ende iustase van den heede alse voer scepenen van der seluer stede ende bekenden ende verlieden dat si ebben vercocht meester salemoene viere pont renten vlaemschs paiments heuwelike ende emmerme ervelike staende ende ouer welke viere pont renten dese heinric moraet ende mergriete siin wettelike wijf met voghede setten te pande ende brochten den here profst vorseit inde hant te meester salemoens bouf vorseit al hare erve die si ebben liggende inde niewe strate met also sulken ghelaghe alsoe gheleghen es Ende dese vergheldinghe van desen viere pont renten gaet hin ende beghint te sente bamesse alsmen sal scriuen jncarnatioen ons heren tualef ondert ende viue ende neghentech jaer ende also vort heuwelike elkes jaers telken sente bamesse deen na dander commende Vort so sekerde ende swoer dese mergriete des vorseids heinrix moraets wettelike wiif dat soe nemmerme dor neghenen commer ofte breke die soe ebben mochte jn wat manieren dat ware eneghe bilevinghe ofte enech recht an de vorseide erve heeschen ofte calengieren soude dat meester salemoene vorseit ofte hiemene die na hem an de vorseide renten quame mochte deeren Ende alle dese vorseide pointe ghelijc dat si ir voren bescreuen siin siin alle ghedaen bi wette ende bi vonnesse van scepenen van sente pieters dorpe vorseit bi den versouke ende den consente van beden partien
</main>
<end>
Ende omme dat alle dese vorseide pointe ende dese rente sullen bliuen heuwelike vast ende ghestade so ebbe jc jan bi der ghenadecheden van onsen here abdt van sente pieters van Ghent bi der bede ende bi den versouke van beden den partien vorseit dese lettren gheseghelt met minen seghele vthanghende met scepenen seghelen van sente pieters voren ghenoemt Ghegheuen jnt jaer alsmen screef jncarnatioen ons heren tualef ondert ende viere ende neghentech jaer Svriendaghs voer alre heleghen dach
</end>