Compilatiecorpus Historisch Nederlands 1.0 (CHN): ambtelijke teksten 1250-1800: gent_1294_2

<begin>
Ic Gheertruud gheheeten de bakinne grote meesterigghe van sente liisbetten houe bi ghent doe cont ende kenlic alle den ghenen die dese letteren zullen zien ofte horen lezen
</begin>
<main>
dat jc bi ghemeenen consente van honslieden ende bi den rade van goeden lieden omme openbare Nutscepe van honzen vorseiden houe ende namelike van honzer fermerien vercochte broedre Janne van zomerghem den meester van sente Jans huse van brugghe svorseids huus bouf zesse pont achte sceleghe ende achte peneghe jaerliker renten te nemene van achte ponden achte sceleghen ende achte peneghen die wi hadden ligghende in de prochie van woest winkele up xiiij bunre lands lettel min ofte meer jn breedebrouc te nemene ende te ontfane te alze zulken termine alze wise hebben gheploghen te nemene ende te ontfane met al den rechte dat wi hadden an die vorseide vi lb viii sol ende viii d ende ant vorseide land daer si up bewiist siin omme eene zekere summe van peneghen dat es te verstane elc pont omme tiene pont dewelke die vorseide broeder jan van zomerghem van svorseids sente jans huus haluen hons al ende gheelike wel ende wettelike betaelt ende vergolden heeft in goeden ghereeden peneghen ende wel ghetelt ende dewelke wi al ende gheelic bekeert hebben in groter nutscepen van honzen vorseiden houe ende van honzer fermerien Voirt es dat te wetene dat mergriete ferrands wiif was heeft xl sol siaers te haren liue an dese vorseide viij lb viii sol ende viii d siaers dewelke xl sol siaers na hare doit siin sculdech up hons te comene ende te keerne Ende van desen vorseiden xl sol siaers hebben wi besproken ende vorewaerde ghemaect die vorseide broeder jan ende jc dat se die van sente jans huus hebben zullen heruelike na diere mergrieten liif in gherechten cope omme alze vele ghelds na de ghelande als hi cochte de vorseide vi lb viii sol ende viii d siaers dat es te verstane elc pont omme tiene pont Ende van deser vorseider renten die wi aldus vercocht hebben ende van desen vorseiden lande worpe wi ende gaens hute ende si sire in ghegaen na de wet ende na de costume van den lande Ende wi belouen hem hier of rechte waersceep te houdene ende te doene alze recht Voirt so worp wi ende Renuncieren allen plaiten allen ghedinghen allen baren ende allen andren dinghen waerbi dat wi doen ofte comen mochten ieghen desen vorseiden coip ende jeghen dese vorseide vorewaerde
</main>
<end>
Jn orconscepe van desen dinghen ende dat si vaste ende ghestade siin ende bliuen hebwi dese letteren gheseghelt met honzen seghelle van honzen vorseiden houe Dit was ghedaen jnt jaer van den jncarnatione dat men screef tualef hondert ende viere ende Neghentech saterdaghes voir sente martins messe
</end>