Compilatiecorpus Historisch Nederlands 1.0 (CHN): ambtelijke teksten 1250-1800: gent_1294_3

<begin>
Het sij cont ende kenlech alle den ghenen die nu sijn ende hijrna wesen sullen
</begin>
<main>
Dat ver lisebette ser symoens mulox dochter heeft vercocht xl s siaers heweleke staende den heleghen gheest van sente niclaus te ghent vp alf de heerve ende vp alf thuus dat leeght bachten willems scandeleins vp de leie an de niewe brugghe vp den hoernich vander steghe de side te jonfro trunen brugghe waert Dese xl s salmen ghelden te tuen tiden vanden jare te alf maerte xx s ende voer sente baefs dach dander xx s vergolden te sine Des ghelouede waerscap soi van merendere Ende ver lisebette ghelouede em scadeloes te audene vp al dat soe heeft
</main>
<end>
Jn hoerconscepe alse heervachteghe liede den here janne hute merham ende philipse hute merham sinen broeder Ende gillise ser willems sone vander lake ende pietre ser juris brebaerts sone Dit was ghedaen jnt caernation hons heren alse men screef mcc ende xciiij jaer jn sente baefs daghe
</end>