Compilatiecorpus Historisch Nederlands 1.0 (CHN): ambtelijke teksten 1250-1800: gent_1296_1

<begin>
Allen den ghenen die dese ieghenwoerdeghe letteren sullen sien ende hoeren der Gherem vter volrestraten boidin vter volrestraten sijn broeder jan van roessellaer ende Pieter ser symoens sone heruachteghe liede in destede van Ghent saluvt ende waerhede teuerstane Wij doen hem allen tewetene
</begin>
<main>
dat pieter vten houe broeder pieters sone vten houe voer ons verlijde ende verkende dat duvsinghe die hier naer staen Ghenoemt boeren thoe den Gots huvse ende then spetale van poertackere staende neffens der stede van Ghent heruelike bouden dien dat die voerseide pieter sal effen derente vanden huusen alse langhe alse broeder pieter vten houe sijn vader leeft Ende voert eeft beloeft die selue pieter ende verkent dat hij die huusinghe houden sal ende sculdech es thoudene alse langhe alse hij derente der af effen sal staende ende teghereke van dake ende van weghen ende ongherghert enne ware dat sake dat sij hergherden van houtheden Ende dat hij dese voerseide pieter elkes tsaers delant huuere van dien huusen gheelijc ende al sal ghelden ende oec van alsoe langhen tijde alse hij derente der af effen sal Voert soe verlijde ende verkende dese voerseide pieter soe wanheer dat dese voerseide broeder pieter huvten houe sijn vader commen es van liue ter doet soe sal die voerseide rente van dien huusinghen stappants thoe boeren gheelijc ende al then voerseiden Gots huuse ende then spetale van poertacker soe dat dese voerseide pieter nemmermeer naer sijns vader doet hiet der af effen mach noe oec daer thoe spreken in eengher manieren welke huusinghe dit sijn duuse die staen onderberghen van up deleyhe commende toter straten in desteghe daer wijlen woenden debagaerde up seelechs gheest van sente mijchiels ende van sente Niclaus heruachtechede van Ghent ende duusinghe die broeder diederic labaen besittende was up den tijt dat hij leefde die up degracht staen neffens den uoerseiden spetale van poertacker dat es teuerstane duuse die staen tuschen ians huuse van ypre vander sijde ter posternen waert ende den huus daer arnout martin nu in woent vander side vanden turre ende dewelke huuse die staen up deruachtechede boidins vos ser heinrics mins jan harops ende ioncvrauwen volcwiuen bruusch ser heinrics bruusch wijf es dit was uerkent ende uerlijt voer ons alse voer heruachteghe liede in de stede van Ghent jn depresentie van den her hughen uter volrestraten ende joerdane ser ians sone ser sanders sone alse prouiseures vanden voerseiden Gots huuse ende ioncvrauwen agheten der meesterigghen vander seluer stede dewelke hier ouer stonden van svoerseits Gots huus aluen
</main>
<end>
Ende in oerconscepen ende in kenlijcheden van al desen voerseiden sticken ende bi der bede van desen uoerseiden pietre soe ebben wij an dese ieghenwoerdeghe letteren gheanghen onse zeghele dit was ghedaen uerlijt ende uerkent int iaer vanden incaernatioene ons heren doe men screef mcc ende xcvi sdoenresdaechs voer sente nichasijs dach
</end>