Compilatiecorpus Historisch Nederlands 1.0 (CHN): ambtelijke teksten 1250-1800: gent_1296_4

<begin>
Het sij cont allen den ghenen die nu sijn <" ende hier nae wesen sullen
</begin>
<main>
dat ser machlems hoer van sente baues ende ver naechten sins wijfs dewelke ver haechte hare begaf in doerdine van sente claren te Ghent ende scalt quite ende ghinc vte alt goet dat soe hadde waest herue waest bileuinghe waest kateile ende deder toe met hande ende met monde al dat soe sculdech was te doene nae de wet ende de coustume vanden lande Ende tforseide hoer ser maechlems ende vernaechten dats te verstaene Ghiselbrecht boidin joncvro volcwijf ioncvro kateline helke met haren voghet ende machlems kindre haerliede broeder was sijn bleuen vp mathise van sente baues ende vp ianne vten boemgaerde van hoghen ende van nederen van al dien dat sijs secghen sullen ende hebben hem lieden ghebonden vor de wet ende vor scepenen van sente baues haerliede secghen te houdene vast ende ghestaede van al dat hem lieden verstoruen es vanden vorseiden her maechleme ende vanden goede dat de vorseide ver haechte huute ghinc ende quite scalt ende hier toe was ghedaen uulle wet alsoe ghelijc alst scepenen van sente baues wel kenleec es Ende dit es tsecghen van mathise van sente baues ende van ianne vten boemgaerde dat Ghiselbrechts kindre sullen hebben xviij bunre ende vij c roeden lants dewelke ghiselbrecht houdende was daer toe sulsij hebben vp Ruelaer ij bunre lants ende 1/2 ghemet l roeden min ende 1 1/2 bunre ende c roeden ende ij ghemete ende in houde mersch v ghemete ende l roeden ende i bunre ende xij roeden ende een huus dat hi nam van moertgauere ende van huusen ende van boemen die wert waren x lb ende vij mudden rocgs ende viij mudde euenen ende c s van v bunren lants die ghesait waren ende hier toe sullensij hebben xiij lb peneghe Vort secghen wij dat boidin hebben sal tgoet vp den dam dwelke goet heet seuenheeken dats xi bunre lants ende een ghemet ende l roeden ende viii 1/2 bunre ende c roeden in den Euen hacker Ende hi sal hebben ene loeue die vpt Goet staet ende dwoenhuus ende twee scuren ende de poerte ende de Gracht ende de vische ende de hupgaende boeme xiij coiie viij Rendre ende ix rendre ende v caluere ende vi bunre rocgs in derde Ende c mandelen stroes ende cxx mandelen Euenin stroes ende lxxxvij scape iiij zwine de Ganse ende de hoenre ende iij lb van coiihuuren dit este verstaene behouden den rechte datter de win an heeft ende hi sal hebben vij lb vi s viij d die de win sculdech es van paerden ende xxxv s vi d die de win sculdech es ende noch xxxiij s die de win sculdech es van harnasche Ende henaf sal boidin toe gheuen xxviii lb xviij s ende ij d Vort secghen wij dat maechlems kindre hebben sullen dlant dat leghet in moert Gauere vij bunre i ghemet ende l roeden ende v c ende l roeden ende v bunre ende 1/2 ghemet ende viii ghemete ende lxxv roeden ende viij ghemete ende lxx roeden ij bunre cxxviij roeden ende ii 1/2 bunre x roeden min vi bunre i ghemet min ii 1/2 bunre heedts xxx roeden min ende de mersch te desselberghine ende xx s ende ij capoene tsiaers licghende vor den polre te Ghent ende deruachtichede te sente baues ende de scure diere vp staet met alden ghelaghe alsoe soe gheleghen es an ser maechlems woninghe was ende x halstere rocgs ende xxx s renten tsiaers ende te melne de mersch diemen heet ter beke dewelke hout iij dachmaele ende xxvi roeden ende an de hofstede daer clais de ketelboetre vp woent te sente baues iii 1/2 s tsiaers henaf moeten sij toe gheuen iiij x x lb xxi s ende x d Vort secghen wij dat joncvro kateline hebben sal alt Goet dat der maechlem ende ver haechte siin wijf houdende waren in de prochie te melne buten ghesteken iij dachmaele ende xxvi roeden mersch die maechlems kindre hebben te melne ter beke dats te verstaene met alle den huusinghen ende met alle den boemen ende met al den ghelaghe alsoet gheleghen es ende iiii bunre rocgs in derde ende iiij x x mandelen stroes vij coiie vi rendere x zwine behouden drechte vanden winne ende xl s van coijhuuren ende van paerden iij lb ende vi 1/2 halstere Euenen ende ij halstre rocgs die de winne sculdech es ende Ganse ende hoenre alse sulc alsij daer sijn Ende van desen goede sal joncvro kateline ende boidin pascharijs hare man gheuen cvij lb dies hebben sij vergolden lx lb bi ons lieden den kindren vten boemgaerde dus sijn sij sculdech xlvij lb Ende dese xlvij lb die boidin pascharis ende kateline sin wijf sculdech sijn Ende iiij x x lb xxi s x d die maechlems kindre sculdech sijn Ende xxviii lb xviii s ij d die boidin ser maechlems sone sculdech es Ende j tsiartre vander stede van viii lb tsiaers daer men af es achter de rente van vi iaren te sente bamesse int iaer van xcvi den welken tsiaertre wij micken vp iiij x x lb ghereets ghelts ende helc vanden iiij ghedeelen vorseit sal gheuen xiiij lb xij s x d Somme van desen vpwaert ccxcv lb xi s ende iiij d Ende henaf es men sculdech ccxcv lb xi s ende iiij d Ende hier bouen heeft men enen tsiaertre vander stede van vi x x lb Ende vander versterften vander boenefemmen xx lb Dewelke twee sticke behoren den vieren ghedeelen toe vorseit Ende quame vanden tsiaertre vander renten van viii lb tsiaers meer dan iiij x x lb dat soude oec behoren den iiij ghedeelen Vort waer dat saeke dat eenech tebaet viele van desen vorseiden ghedeele dat deen den andren hiesche ofte heeschen mochte so secghen wij dat wij dat houden tonswaert te verclaerne ende te versceedene
</main>
<end>
Dit secghen was Gheseit jnt iaer vanden incarnatioene ons heren dat men screef mcc ende xcvj sondaghes nae sente baefs dach te selechs kers vp tkerchof vor willem vander woestinen alse bailliu ende vor ianne den brunen ianne vander straten heinric ackermanne woutren den wielmakere ende mathise winnepenninc alse scepenen Ghedinct van mire vrowen vernaechten die sente claren begheuen es
</end>