Compilatiecorpus Historisch Nederlands 1.0 (CHN): ambtelijke teksten 1250-1800: gent_1296_5

<begin>
</begin>
<main>
Dit es de goedinghe die ser juris haecs kindre an hem trecken ende de welke die hem toe behoren alse vander versterften van harre moeder Dat es te verstaene ii lb vlaemsce die hem der joeris hareliede vaeder sculdech es van haren ghedeele van harre moeder Ende die heuet hi hemlieden ghelouet ende bewiist vpt hues ende vp deerue dat staet vp de hogheport vp den hornec vander steghen neffens den huse vander sickelen Ende vp al de inhaue die behort ten vorseiden hues Ware oec dat saeke dat daer an iet ghebrake soe heuet hire ouer gheset te pande alt goet dat hi heuet binnen der stede van ghent jn wat manieren dat gheleghen es Dit ghelof ende dit bewiis was ghedaen vor den her pietere den vos den her claise willebarde ende den her simone vanden pitte diere ouer waren alse heeruachteghe liede jnt jaer ons heren mcciiiixx ende x jnde weke vor kersauont Ende omme dat der pieter de vos ende der clais willebart doet siin soe verniuwede der joeris dese vorseide sticke vor den her janne vanden pitte den her boidine vander lake ende den her boidine den pape alse vor heeruachteghe liede Ende hier toe bieden de vorseide kindre te doene al dat der wet sal dinken dat sii sculdech siin te doene Ende begheren an den heere dat hi hem hare recht der in behoude
</main>
<end>
</end>