Compilatiecorpus Historisch Nederlands 1.0 (CHN): ambtelijke teksten 1250-1800: gent_1296_6

<begin>
Jc symon van desseldonc Riddere ende broeder van sente jacobs huus vp tniewe land Ende ic alise siin wettelijc wiif vrouwe van theemseke ende van sente jans ten steene suster van sente jacobs huse voerseid doen te wetene alle den ghenen die dese letteren sullen sien ende hoeren lesen ende die nv siin ende hiir na comen sullen
</begin>
<main>
dat die proeueerres ende die dekenen van sente jacobs huse vp tniewe land bi Gent als men huit vaerd te biruliet waerd in tbiscop doem van dornike voerseid dats te wetene nijs die broekere Seger huten dale huit der cupers stege kerstiaen die beuer boidiin van den hoedekine clais gonterauen Eueraerd van den vanekine Goesiin dhoem jan van astine jan van balgeroeke huge van der most ende jacob huten wlgen hebben gecocht shuus boef van sente jacobs voerseid jeghen ons wettelike ende redenlike viere ofsteden die ligghen vp tnieweland an sente jacobs huus voerseid in die prochie van shelechs kerst te Gent dats te wetene daer arnoud cnop vp woende huge die viltre jan van desseldonc ende oliuijr ser oliuiirs sone Ende den pit die leecht naest der hofsteden daer oliuijr ser oliuiirs sone vp woende toter straten toe wers ende lancs tote den hende van sente jacobs huse voerseid Ende al dat desen vieren hofsteden thoe boerd dats te wetene tuschen den pael ghesteeken neffens der straten tote daer daer jans vos galeiden vp staen ende al dat leecht tuschen desen tueen palen Ende van den pale die ghesteeken es neffens jans vos galeiden voerseide streckende nederwaerd toten waterganghe daer die pael steect die der hofsteden toe boerd Ende an dander side van den watergange daer die pael steect altoe streckende vpwaerd ten voerhoefde waerd toten waterganghe toe daer die pael steect Ende desen coep hebsi jeghen ons gecregen wettelike ende redenlike om hene summe van penninghen ende shuis boef voerseid die welke summe si ons wettelike ende redenlike in goeden ende in gereeden payemente ende wel gheteld hebben vergolden ende kennen wel ende lyen dat ons wel es vergolden ende sceldense der of quite claerlike ende al Ende van desen vieren hofsteden voerseid ende van den pitte ende al datter toe boerd gheloef wi hem ende den huse voerseid te wette ende te waerne shuus boef jeghen helken man ende wiif ende wi willen ende consenteren dassiit besitten ende thuis gebruke ten heweliken daghen paysenlike ende rustenlike shuis boef voerseid van al den rechte datter ons toe boerd sonder henege calaenghe van ons te doene of van onsen hoere Ende hiir binde wi ons dese ordinanchie ende desen coep te houdene sonder heneghe verwandelinge ten heweliken daghen houer ons ende houer ons hoer dat wi hebben of hiir na gecrighen moghen beede met sekereden ende met heeden ende ghelouent ende suerent nemmerme der jeghen te gane stillikine no lude doer neghenen noed no beduanc ende doere toe hand ende mond ende gaens huit ende almens claerlike ende al thuus boef van sente jacobs huus voerseid Hiir bouen renuntieren wi alle baren alle exceptien alle letteren alle priuilegien ende alle hulpe van rechten beede ter gheesteliker wette ende ter waerliker wette ende bileuinghen bi onsen hede ende sekerede vorseid ende al dat ons in baten mach staen ende comen ende den voerseiden proueerres ende den dekenen ende den huse voerseid in onbaten ende daer dese jegenwoerde tsaerter ende dat hi houdende es in eriger manieren bi mochte werder gecasserd
</main>
<end>
Ende om dat wi willen dat dese dinghe voerseid clene ende groet claerlike ende al sonder henech weder segghen vast bliue ende gestade soe hebwi beede helc sinen proper segel in kenlikeden an desen tsaerter gehanghen Jnt jaer ons heren als men screef dusentech tuee onderd vierewaruen tuintech ende sestiene saterdaghes voren letare iherusalem dat men heet alf vastine
</end>