Compilatiecorpus Historisch Nederlands 1.0 (CHN): ambtelijke teksten 1250-1800: gent_1296_7

<begin>
HEt si cont al den ghenen die dese lettren sullen zien ende horen lesen
</begin>
<main>
Dat zoetijn blankarts heeft ghegheuen der fermerien van sente lizebetten i buenre mersch xxxiij roeden min lichende in de doerme ende i ghemet lants xl roeden min lichende in cattenbrouc Ende dat van deser merchs ende van desen lande jaerlijchs comt dat sal dese voerghenoemde soetijn heffen al soe langhe al soe leeft Ende alse de fermerie in doet de vrucht van deser voerseider mersch so sal soet ghelden na den prijs ende na de werde van den lantghanghe al soe alset ghaet in die mate bedi dies meest gheuet hi heist de naeste Ende ware dat sake dat dese vrucht ware belet mids der fermerien so ware sculdech soetine te versettene Ende vort so es sculdech de fermerie te gheldene al den cost die up dit lant gheet Ende na haer lijf so saelt bliuen quite ende vri ende onghecalengiert der fermerien van sente lizebetten ouer hare ziele ende hare vriende Daer binnen salmen doen een jaerghetide ouer soetijns ziele ende haers vader ende hare moeder ende iij zielen daer of sal hebben elc pape xij d Ende de costre vj d Ende elke zieke ene pinte wijns up den dach van den iaer ghetide Ende voert leeft dese voerseide zoetijn tote sente jans messe so sal soe hebben dese voerseide vrucht ende steruet soe der voeren so bliuet der fermerien van sente lizebetten van ghent
</main>
<end>
Ende om dat wi willen dat dit ghoet vast bliue ende ghestade so es de zeghel van der fermerien ghehanghen an dese iheghenwoerdeghe lettre Djt was ghedaen in iaer ons heren doe men screef mccxcvj hachtdaghe voer meie
</end>