Compilatiecorpus Historisch Nederlands 1.0 (CHN): ambtelijke teksten 1250-1800: gent_1298_1

<begin>
Het sii cont ende kenleec alle den ghenen die nu siin ende hier nae wesen sullen
</begin>
<main>
dat willem masch ende gillis siin broeder die ser willem masch kindre waren willem jan kerstiene ende annes ser boidin masch kindre ende heilesoete harre suster dochter die hem segghen hoir van mester volker masche quamen vor heeruachteghe liede binnen ghent ende verkenden ende verliiden al daer ouer hem ende ouer alle de ghene die recht hebben of heschen mochten vander versterften van mester volker masche dat wel hare wille ware ende hare consent ende euweliic wesen soude dat deeruachtechede die mester volker masch hadde binnen der port van ghent daer de ghene vp wonnen die hier nae bescreuen staen gae ende toe behore gheheliic ende al ter capelrien bouf die deghene die hem segghen testamenterres van mester volker masche segghen datse mester volkere gheset soude hebben binnen sinen liue jnde kerke te sente verilden euwelike te besinghene at es te verstaene deeruachteghede die leghet in sente verilden prochie neffens sinen groeten hues dat men heet tparadis daer der jan faber de capellaen vp woent ende jan de smet ende daer naest daer jan dullart een hues vp heft staende tuschen mester volkers porte sgrauen steene warts ende boidins breidelmakers was Ende deeruachtechede vp den houtbriel dat heet willem goeps steen daer vp dat wonnen lisbette mattheus wedewe heinriic de wulf gillis van roesebeke ymmesoete paps ende jacop van desseldonc Ende waer dat saeke dat de vorseide personen die hem hoir segghen van mester volker masche enech recht hadden ofte hebben mochten an dese vorseide heeruachtechede of dat se hem toe mochte siin comen in eregher manieren van mester volkers doede ofe ander sins hoe soet ware dat scelden sii quite gheheliic ende al bede ouer hem ende ouer alle de ghene diere toe behoren of behoren mochten van diere partien ende gheuent vp euwelike om te behorne ter capelrien bouf vorseit nae de wet vander port Ende suoren ende sekerden dat sii nemmermeer comen ne sullen ieghen dese vorseide vorewarde no recht heeschen an enech stic datter vorseider heruachtegheden toebehort ende ghelouedent te waranderne jeghen elken meinsce ter capelrien bouf vorseit alse verre alsii sculdech siin te doene nae de wet vander port Vort es hare wille wel ende hare consent dat al de rente ende deeruachtechede die mester volker hadde inde prochie van ysenghem behore oec al dies ghelike ter vorseider capelrien bouf euweliic van desen daghe vorwarts Ende sii gheloueden vort hadden sii enech recht der an dat siit quite scelden souden onthier ende sente martins dach dat naest comt vor de wet daer soe onder gheleghen es ende dat scelden sii al nu quite ende gheloueden met heede ende met sekerheden nemmermeer recht der an te heeschene no der jeghen te gaene ende dat te waranderne gheliic dat sij gheloft hebben vander heeruen die leghet binnen ghent Vort soe hebben sii verkent dat sii ontfaen hebben van mester pieter van zeelant penanchier ende van mester jacoppe van ghent canoeneke van dorneke ende vanden her gillise pape van valvain die segghen dat sii siin executeurs van mester volker masche cc lb tornois van mester volkers goede daer sii segghen dat sii macht ouer hebben der vp te ordenerne alsoe alst hem nutte dinct Ende dit was ghedaen om pais ende om ruste ende om alle calange af te doene ende om dat sine naeste maghe waren Ende ware dat saeke datter eneghe calange af quame naemaels nae de wet vander port die gheloueden sii af te doene ende ne mochten sii se niet af ghedoen dat sii hemlieden dit ghelt weder keren souden Ende al dit gheloueden sii te houdene vast ende ghestaede bi trouwen ende bi sekerheden vp hem ende vp alt hare ende elc ouer al
</main>
<end>
Dit was ghedaen ende verkent vor den her hughen vter volrestraten boidine sinen broeder jan trijle ende boidine den muntere diere ouer waren alse heeruachteghe liede binnen ghent ende vor den deken vanden kerstinede van ghent ende vor mester gillis crommeline alse orconden jnt jaer ons heren doe men screef mcc ende achte ende neghentech jnde maent van octembre smandaghes vor sente denis dach diederike vander lake
</end>