Compilatiecorpus Historisch Nederlands 1.0 (CHN): ambtelijke teksten 1250-1800: gent_1298_2

<begin>
Het sij cont ende kenlijc alle den ghenen die nu sijn ende hijrna wesen sullen
</begin>
<main>
Dat symoen vanden briele Die ser ghiselbrechts sone was vanden briele bekende ende bewijsde Den heleghengheest van sente niclaus te ghent xl s vlaems paiments elkes jaers sente bamesse te gheldene vp de heeruachtechede daer vp woent heinric drieghe vp sborgrauen briel Ende dese xl s soe magh de voernoumde symoen afcopen ofte weder ebben om xxiiij lb vlaems paiments Dese xl s siaers ofte dese xxiiij lb daer hi dese xl s mede quiten magh bekent hi van sijns vader aluen alse van heenen mudde rogs dat hi gaf siaers eweleke den voerseiden heleghengheest Dese bekenninghe ende dese bewisinghe was ghedaen vp sborgrauen briel voer der karmers voer willemme vander quaderstraten alse baliu sborgrauen ende man Ende voer janne van kersbrigghe ende mase van den westuelde alse manne sborgrauen Ende voer den here heinrike leiscoue ende claise vander coutren alse heervachteghe liede in sborgrauen gherechte Ende hijr over stont der heinric ser domaes sone alse prouiseur ende berechtere suoerseids heleggheests
</main>
<end>
Dit was ghedaen jnt jaer hons heren alsmen screef mcc jaer & xcviij saterdaegs voer sente martins dach
</end>