Compilatiecorpus Historisch Nederlands 1.0 (CHN): ambtelijke teksten 1250-1800: gent_1298_3

<begin>
Het sij cont alden ghenen die nv sijn ende hier nae wesen sullen
</begin>
<main>
dat ghiselin dictus die hoer es van ver machtilden ser andries scotkins wijf was verkende ende verlide dat hij sculdech es ix halster roghs drien heleghen gheesten dat es te verstane sente michiels sente verilden ende te dronghine elken heleghengheest drie halster te gheldene te kerssauonde ende dit ghelouede de voerseide ghiselin dictus vp al dat hij ligghende heeft in sborchgrauen gherechte ende vp hem seluen ghebrake daer an hiet tote diere wilen dat de voerseide ghiselin seker adde ghedaen den voerseiden heleghengheesten in ervachtecheden te dronghine ofte elre van soe vele coerens jaerlix daer hem de voerseide heleghegheeste ghepait mede moghen houden Orconde van al desen scepenen vte sborchgrauen gherechte den her heinric leiscoeue ende heinric drieghen
</main>
<end>
Dit was ghedaen jnt jaer ons heren mcc ende xcviij smaendaghes na sente nicasis dach voer heineman drieghs an sborchgrauen briel
</end>