Compilatiecorpus Historisch Nederlands 1.0 (CHN): ambtelijke teksten 1250-1800: gent_1310_1

<begin>
An alle de ghone die dese lettren sullen sien ofte hoeren lesen Scepenen van der stede van ghent saluut met kennessen der waerheden weten alle
</begin>
<main>
dat der heinric de jonghe ende der woutre leewerke onse ghesellen jnt Scependom ons kenlic ghemaect hebben dat Sij alse prouisoerres van onsen haluen van den gasthuse van ghent hebben ghegheuen ende gheuen janne broetloese ende mergrieten sinen wiue een stic lands dat een merschelkin es ligghende bachten tfoerseids jans broetloes omme twintech scele parisise tsiaers te eenen herueliken tsense te houdene ende te besittene te hare beeder liue ofte tsgheens liue die langhest leuen sal van hem beeden omme den voerseiden tsens ende niet langher
</main>
<end>
Jn kenlicheden van desen lettren beseghelt met onsen contersaiele van der stede van ghent voerseit Die waren ghemaect ende ghegheuen jnt jaer ons heeren doe men screef M CCC ende tiene jn sente pieters daghe jn sporkele
</end>