Compilatiecorpus Historisch Nederlands 1.0 (CHN): ambtelijke teksten 1250-1800: gent_1313_1

<begin>
Kenlijc Sij hem allen die nu Siin ende hierna comen sullen
</begin>
<main>
dat joncfrrouwe cateline Ser willem dularts dochter was ende goessin van massemijnste[n]e har wettelike man vercochten ende droughen vp jn allen heygindumme de begaerden jn ghent die wonen an de santpoerte al dat recht dat Sij adden an twe ofsteden met allen den ghelaghen diere toe boeren die lighhen an de scabrugghe daer luger van vinderoute twe huse vp heuet staende dwelke recht rent liij Scellinghe parisise tsiaers ende al dat recht dat Sij adden an eene ofstede met allen den ghelaghen diere toeboeren die leghet an de mere daer jan van dankart [] een hws vp heuet dwelke recht rent viij Scellinghe parisise tsiaers ende sij waerpens ende ginghens hute ende dader toe met ande ende met monde al dat Sij sculdech waren te doene na de wet van der poort omme hem dar of tontheruene ende de begaerde voerseit te heruene ende sij kenden ende sij lijden dat Sij wel ende wettelike vergolden Siin van al ende de begaerde voerseit beualen hem de waerscepe ende sij ontfinghense ende gheloefdense alse recht na de wet van der poert hier ouer waren gheroupen jn orconscepen alse heruachteghe liede jn ghent ghisebrecht p[o]llein ende jan van louendeghem
</main>
<end>
Dit was ghedaen jnt jaer ons heren alsmen screef M ccc ende dertiene Sfrindaghes na Sente martinsdach jn den winter
</end>