Compilatiecorpus Historisch Nederlands 1.0 (CHN): ambtelijke teksten 1250-1800: gent_1323_1

<begin>
Wij jan masch jan jnghel Ghelnoet de Amman ende onse gesellen Scepenen jn ghent d[oe]n te wetene allen den ghenen die nu sijn ende hier na wesen sullen
</begin>
<main>
dat wij gheuen Annekine bodemans kint te eenen herueliken tsiinse eene hofstede ligghende up de houe neghentiene Roeden lang lettel min ofte me[e]r omme drie scheleghe ende sesse peneghe parisise tsiaers te gheldene te elken sente bamesse behauden den goede[n] weghe ende den waterganc te haluen bodeme van der houe de welke hi hauden moet souffissantelike up sinen cost Ende behauden dien dat de visscherien bliuen der stede van ghent
</main>
<end>
Jn kenlicheiden van desen dinghen so hebben wij dese lettren beseghelt metten contersegle van der stede van ghent voerseit die waren ghegheuen jnt jaer ons heeren doe men screef dusentech driehondert ende drie ende twintich jn sente maercus daghe Ewangelist
</end>