Compilatiecorpus Historisch Nederlands 1.0 (CHN): ambtelijke teksten 1250-1800: gent_1328_1

<begin>
Ane alle de ghene die dese letteren zullen sien of horen lezen [heerem] bi den ghedoeghe ons heren abt van den Cloestre van sente baefs van ghend ende alt Conuent van der seluer stede van sente benedicti[ns] ordene van den biscopdomme van dornike salut in onsen heere met kennessen van waerheden weten alle
</begin>
<main>
dat wi ouer ons ende in den name van ons ende van onsen vorseiden cloestre ende van onsen na commers ebben gheottroijert ende ghegheuen Erachtighe lieden ende vroeden onsen lieuen ende gheminden vrienden in gode thomase van varnewijc ende sinen ghesellen scepenen van der stede van ghend ter stede bouf vorseid twee bunre mersschen ligghende teere stede die men heet ouer reke omme quareele te doen makene van der erden die men nemen ende deluen sal vten vornoemden merssche mids alsulken vorwarden ende Conditien alse hier naer volghen ghescreuen Dats te verstane dat wi Sin sculdich te hebbene ende zullen ebben den Neghenden quareel van allen den quareelen die men deluen ende maken sal van der vorseider merssche Ende telken dat een [hauenhoec] sal sin So moeten si onse deel van den vorseiden quareelen doen doen vten h[a]uene ende doense daer an setten teenen hope ghelijc den haren vp der stede cost vorseit Vort So sin si alle de pitten daer men de erde nemen ende deluen sal ten quareelen bouf sculdich wel ende Soffissantelike te doen slechtene elx jaers vp den cost van der vorseider stede Ende ware dat zake dat gheuiele vp eenich jaer dat si van diere vorseider merssche gheene quareele en daden maken no deluen of dat siere min daden maken So dat dan onse deel min werd ware dan sesse pond parisise So sin si ons sculdich te gheldene ende te betaelne sesse pond parisise ouer tRecht van den neghenden quareele Ende alsoe van elken iare daer si niet in werken en daden alsoet vorseit es Vort ebbe wi ghegheuen den vornoemden Scepenen ter stede bouf vorseit een half bunre merschs ligghende neffens den vorseiden tween bunren te loyalen pachte durende alse langhe alse men in de zelue twee bunre mersschen sal deluen omme dertech Scellinghe parisise elx iaers Ende in dat half bunre merschs ne zullen si niet moghen doen deluen ne waer si moghenre haren h[a]uen vp doen maken ende hare werc der vp doen ghereeden van den quareelen ende els niet Ende alsi nemmeer ne doen deluen no quareele ne doen maken So zullen de h[a]uene daer men de quareele n ghehadt heeft ende de mersch vorseit bliuen ende behoeren ons vry ende paysiuelike alse onse propre herue Ende datter de stede van ghend dan vortwaert meer gheen recht ane hebben ne mach no sculdich ne sin te hebbene
</main>
<end>
jn orconscepen van welken dinghen ebbe wi dese letteren bezeghelt met onsen zeglen de rasure daer men seght stede approberen wij Dit was ghedaen int jaer ons heren als men screef M ccc ende achte ende twintech sdonredags naer belokenen paeschen
</end>