Compilatiecorpus Historisch Nederlands 1.0 (CHN): ambtelijke teksten 1250-1800: gent_1331_1

<begin>
Het Sij cont ende kenlijc allen den ghenen die nu sijn ende hier nae wesen zullen
</begin>
<main>
Dat der fransoys pijl capl laen in sente jacobs huus up de Mude heeft jaerliker renten ziere capelrien toe beorende xx scellinghe parisise up een huus ende alle de heruachtechede diere toe beoorden van voren [d] straten tote bachten dat willem was Goessins van dackenam ende nu audende es jan curthals de welke herue men houd van min here heinric brame Ende omme dat de vorseide heruachtechede ghearghert ende gheminct was van goessijn vorseit Soe es commen joncvrouwe kateline sraeds jacop srads dochter was de welke hoyr was vanden here goessine vorseit ende heeft een stic heruen dat leghet bachten willems van led[j]ne gheset jn pande ten heuweliken daghen den here fransoyse vorseit ende allen sinen nacommers de vorseide xx scellinghe parisise te jnnenne up tforseide huus ende up de twee vorseide stic heruen elke siaers te elken sente baues messe Hier ouer was alse maenre diederic heins zoene in mins ser heinric braems stede al machtech ende alse late jan van wettere ende arnoud de doblere
</main>
<end>
dit was ghedaen jnt jaer ons heren als men screef M ccc ende xxxi Sdicendaghes nae sente bauen dagh
</end>