Compilatiecorpus Historisch Nederlands 1.0 (CHN): ambtelijke teksten 1250-1800: gent_1355_1

<begin>
Kenlijc zij allen den ghenen die nv zijn ende hier naer wezen zullen
</begin>
<main>
Dat Broeder Jan kauthaerd Meester van den [begh]aerden in ghend heeft ghecocht ende ghecreghen wel ende Redenlike Jeghen pieter betten ende jeghen ioncurouwen sophyen zinen wetteliken wiue Drie ponde parisise heerueliker Renten elkes tsiaers eeuwelike staende ende gheduerende ter fermerien ende ter zieker bouf van den beghaerden voorseit Omme eene zekere ghenoemde Somme van ghelde waer af dat hem pieter bette ende ioncurouwe sophie zijn wijf bekenden hem beeden wel vergholden betaelt ende al ghemoet van Broeder janne voornoemt Ende de welke voornoemde heeruelike Rente zij hebben bezedt ende bewijst jaerleexs te heffene ende tontfane altoes te kersauonde vp al de heerue also verre alse de ghelaghelijcheden streckende van vooren tote bachten van tween huusen diere vp staen ligghende in de cruusstrate naeste jans spelliaers huus ende herue ane deene zijde ende pieter bets poorte ane dandre zijde Van welker voornoemder heeruen ende heerueliker Renten die Pieter bette ende ioncurouwe sophye zijn wijf vercocht hebben Ende zij daden daer toe met hande ende met monde al dat zij sculdech waren te doene na de wet costume ende husaige van der poort van ghend Omme hemlieden daer af tonthuuttene tontheeruene ende tontgoedene Ende zij hebbere Broeder Janne ter fermerien ende ter zieker bouf van den begaerden voornoemt der toe ghedaen ende ghedreghen vppe jn gherechten wetteliken coepe ende in allen eyghijndoemme ende daer in gheheerft ende ghegoed alse der fermerien voorseit propre ghecochte ende ghecreghen eyghijn goed Ende zij gheloefden hem hier af de wettelike waerscepe na de costume ende husaige van der poort van ghend Ende Broeder Jan voorseit heeft hemlieden de waerscepe weder beuolen alse Recht Ende mids dat dese heerue diere vercocht es wylen ghecreghen was jeghen Boydine Rijme Omme desen coep goed ende ghestade te bliuene zonder eeneghe Calaenge van hem van zinen oere ende nacommers So heeft hier toe de voorseide Boydijn sijn consent ghedaen Ende van al den Rechte dat hiere an hadde hebben Ofte heeschen mochte toten daghe van heden So es hij af gheghaen ende waerps met halme na de wet van der poort van ghend ghelijc dat pieter en zijn wijf voornoemt ghedaen hebben alsoet es voorseit Ende hij bekende hem daer af van al tal wel ghepayt verzaed ende vernoucht Ende dat Recht heeft hij al te male quijte ghescolden scelt quijte ende al quijte tallen daghen
</main>
<end>
Hier ouer waren gheroupen jn kenlijcheden alse heeruachteghe liede binnen [ghe]nd Meester jan van doeynze Ser Jans van doeynze zone was Ende Jan Rijcquaert Dit was ghedaen vp den viertiensten dach in april Jnt J[aer] [on]s heeren doe men screef dusentich drie hondert vijftich ende viue
</end>