Compilatiecorpus Historisch Nederlands 1.0 (CHN): ambtelijke teksten 1250-1800: gent_1356_1

<begin>
Kenlec sij allen den ghenen die nu sijn ende hier na wesen zullen
</begin>
<main>
Dat zegher huten dale heeft ghecocht ende ghecreghen wel ende redenlike in de name van Claykine ende Meerkine Clais kindre huten houe waren jeghen mijn heere Symoene den riken Ruddre Ghiselbrechte den grutre ghiselbrechts zone was Ghiselbrechte van den damme ende willemme den pape pieters zone deeruachtechede ligghende vp de hoeghe poert tusschen scepene huus an deen zide ende caelmont an dander zijde vp de welke eeruachtechede symoen gommaer een huus heeft staende dat men heet den pelegrijm met zeuen ponden ende tiene sceleghe parisise jaerlix der hute gaende te lant cheynse Ende dit omme eene zekere somme van ghelde van der welker de voerseide vercoepers hem kenden wel betaelt ghemoet ende ghenouch ghedaen ende ghinghen hute van der voerseider eeruachtecheden ende worper ende dader toe met hande ende met monde al dat sij sculdech waren te doene na wet costume ende vsagen van der stede van ghent omme hem lieden der af tontheeruene ende tontgoedene ende zegher voerseit was der in gheerft ende ghegoet in de name van den voerseiden kindren alse in sijn vrie eyghijn coep goet Ende de voerseide vercoepers gheloefden zegheren voerseit in de name van den voerseiden kindren wettelike waerscap ende hi beualse hem lieden weder alse recht Ende voert es te wetene dat de voerseide vercoepers hebben hier af veruaen ende elc ouer al al thoyr van mijn heere woutren van berchem was ruddre die hem eenechs rechts vermeten mochten an dese voerseide eeruachtechede
</main>
<end>
Hier ouer waren gheroepen in orconscepen alse eeruachteghe liede in ghent Der jan rijnvisch priester Symoen de grutre heinricx zone was ende lieuijn Rijnvisch Dit was ghedaen jnt jaer ons heeren doe men screef M CCC zesse ende vijftech den zesse en twintechsten dach van Nouember
</end>