Compilatiecorpus Historisch Nederlands 1.0 (CHN): ambtelijke teksten 1250-1800: gent_1357_1

<begin>
Kenlijc zij allen den ghenen die nu zijn ende hier naer wezen zullen
</begin>
<main>
Dat Broeder Jan Couthaerd Meester van den beghaerden jn de stede van Ghend heeft ghecocht ende ghecreghen wel ende Redenlike ter fermerijen bouf van den beghaerden voorseit jeghen jacoppe Euerboude viere ponde Sesse scellinghe parisijse eerveliker Renten tsiaers elken Sente bamesse jn elc jaer eeuwelike duerende de welke staen bewijst ende verzekert jaerleexs te heffene ende tontfane ten daghe voornoemt vp de heerue daer Een huus vp staet toe behoorende heinrijcke den Ruede ende der joncurouwen sinen wiue ligghende ouer leye bi fransoys sloefs Tusschen den huus ende heruen dat hem toe behoort dat men heet den Jnghel ane deene zijde Ende heinrijcs Rueden huus ende heerue dat men heet steenhuus an dander zijde Ende dit heeft broeder jan voorseit ghecocht Omme Eene zekere ghenoemde Somme van ghelde waer af dat hem de voorseide jacob euerboud bekende wel vergholden betaelt ende al ghemoet van broeder janne voornoemt Van welken viere ponden Sesse scellinghe parisijse heerueliker Renten tsiaers metter heeruen daer zij vp bewijst ende verzekert staen De voorseide jacob euerboud hute ghijnc ende waerps met halme Ende hij dede daertoe met hande ende met monde al dat hij sculdech was te doene naer de wet Costume ende husaige van der poort van ghend Omme hem der af tonthuuttene tontheeruene ende tondgoedene Ende hij heefter Broeder janne voornoemt toe ghedaen ende ghedreeghen vppe jn Rechten wetteliken coepe ende jn allen eyghijndoemme jn de name ende ter fermerijen bouf voorseit Ende der fermerijen voorseit der jnne gheheerft ende ghegoed alse jn hare propre ghecochte ende ghecreghen eyghijn goed Ende de voorseide jacob gheloefde hier af de wettelike waerscepe naer Costume ende husage van der poort van ghend Ende de voorseide broeder jan jn de name ende ouer de fermerije voornoemt heeft hem de waerscepe weder beuolen alse Recht
</main>
<end>
Hier ouer waren gheroupen jn kenlijcheden alse heeruachteghe liede binnen ghend Meester Jan van doeynze Ser jans zone was van doeynze Ende jan Rijcquaert Dit was ghedaen vp den xvsten dach binnen aprille jnt jaer ons heeren doe men screef M CCC zeuene ende vijftich
</end>