Compilatiecorpus Historisch Nederlands 1.0 (CHN): ambtelijke teksten 1250-1800: gent_1362_1

<begin>
An alle de ghene die dese jeghenwordighe letteren sullen sien Of horen lesen Wij broeder jan lauwerins Meester van den beghaerden jn de stede van ghend Ende alle de broeders ende elc sonderlinghe van der seluer stede Saluut met kennessen der waerheden wij hu allen doen te wetene Ende elken sonderlinghe
</begin>
<main>
Dat wij hebben vercocht Onser lieuer gheminde jn gode ver Aeghten ser Mattheus van ghendbrugghe wettelike wijf Twalef pond parisise Of de weerde jn Andren ghelde alsulc ghelt alse de stede van ghent jaerlix sal doer ontfaen van haerre erueliker renten Ende dit tharen liue lanc ghedurende Ende niet langhere Omme ene somme van ghelde van denwelken dat wij broeder jan voorseit Ende alle onse broedre van den voorseiden beghaerden ende elc sonderlinghe Ons seluen kennen wel ende soffisantelike gheel ende al betaelt ende vergolden jn goeden ghereeden ende wel ghetelden ghelde De welke twalef pond parisise wij broeder jan vorseit Ende al onse vorseide broedre Ende elc sonderlinghe hebben bewijst Ende versekert bewijsen ende versekeren vp Ons ende vp al onse goed so waer dat gheleghen es binnen ghend Of der buten Ende belouen dat der vorseider ver Aeghten bi trauwen ende bi waerheden te gheldene Ende wel te betaelne Deerste payment jn onser vrouwen daghe lichtmesse jnt jaer M CCC drie ende tsestich Ende also voort van jare te jare haer leuen lanc ghedurende Ende niet langhere also vorseit es zonder haren cost ende scade Ende gheuielt so dat soe scade der bi hadde Die scade ghelouen wij hare Ouer ons ende onse nacommers vp te rechtene ende te gheldene metter principaelre renten sonder yet te minderne
</main>
<end>
jn orcondscepen Ende jn kenlijcheden der waerheden So hebben wij broeder jan Ende alle onse vorseide broedre dese letteren doen zeghelen metten zeghele van onsen ghemeenen conuente huuthanghende Die waren ghemaect ende ghegheuen jnt jaer ons heren als men screef M CCC twee ende tsestich vp den vijftiensten dach in laumaent
</end>