Compilatiecorpus Historisch Nederlands 1.0 (CHN): ambtelijke teksten 1250-1800: gent_1363_1

<begin>
Kenlic zij allen lieden
</begin>
<main>
dat broeder Jan cautaerde heeft ghecocht ende ghecreghen wel ende redelike Jeghen lieuin van fermelis ende jonfrouwe kateline sinen wetteliken wiue x scellinghe parisise heruelike rente siaers bewijst ende te heffene telken sente bamesse in elc iaer van welker herueliker renten metter heruen daer soe vp bewijst es Ende vort deselue broeder Jan heeft ghecocht ende ghecreghen wel ende redelike Jeghen lieuin van fermelis Ende Jonfrouwe kateline sinen wetteliken wiue vornoumt vi scellinghe ende x deniere parisise ten seluen termine vorseit vp thuus in de munte datmen heet in de cra[j]e daer in dat wonende es jan ghiselins diemen heet langhe nose Ende lieuin van fermelis ende Jonfrouwe kateline vornoumt beede hute ghinghen ende worpens met halme Ende si daden daer toe Met hande ende met monde al dat si sculdich waren te doene na wet costume ende husage van der poert van ghent om hemlieden daer af tontheruene ende tontgoedene Ende den seluen broeder Janne cautaerde daer in te heruene ende te goedene alse in sijn proper eyghin ghecocht ende ghecreghen goet Ende sij gheloofden hier af de wettelike waerscepe Ende broeder Jan vorseit beualse hemlieden weder alse recht Ende dese voerseide coepe sijn ghedaen om eene somme van ghelde daer af dat hem lieuin van fermelis ende Jonfrouwe kateline sijn wettelike wijf bekenden wel betaelt ende al ghemoet van broeder Janne vorseit
</main>
<end>
hier ouer stonden in kenlichede der wareden alse heruachteghe liede in ghent Der lieuin van der biest Ende Mattheeus van ghentbrugghe Dit was ghedaen int iaer ons heeren als men screef M ccc lxiij vp den achtienden dach van sporcle
</end>