Compilatiecorpus Historisch Nederlands 1.0 (CHN): ambtelijke teksten 1250-1800: gent_1377_1

<begin>
Kenlic sij allen lieden
</begin>
<main>
dat gillis de hodeueere ende aechte van reetbosch sijn wetteleke wijf hebben vercocht wel ende redeleke Janne van den gauere ende alijssen svos zinen wetteleken wiue een huus ende stede met alle den ghelaghe die den huse ende steden toe behoren van voren tote achter ter scelden toe comende erd vast ende naghel vast staende vp tsant bi sente lievins poorte an de west zide van der straten pieter de vos woonnende jn deen zide Ende Jan pieters Jn dander zide vp die erue toe behorende sente Jacobs huse ende eenre capelryen van sente verhilden met viuetiene schelle parisise siaers daer huut gaende sente Jacops huse vorseit ende viue scelle achte penne allinc parisise der capelryen vornoemt te lantcheinse sonder mer commers Ende dese coop es ghedaen om lijfrente te gillis liue ende te aechten sijns wijfs bouf vorseit dats te wetene dat die vorseide Jan van den gauere ende allijsse sijn wettelike wijf vorseit of de ghene dien dit vorseide huus ende stede namaels toe comen sal waert bi sterften of bi cope zullen gheuen alle Jare gillise ende sinen wiue vorseit viere ende twintich schelle groter tornoyse alse langhe alsi beede leuen zullen te tween termine binnen elken Jare deene heelt te sente Jans daghe Jn midden somere Ende dander heelt telken kersauonde daer of deerste payement valt sente jans daghe babtisten Jn midden somere naest comende Ende so wanneer deen van hem beeden sterft so sterft alf de lijfrente vorseit Ende so wanneer dat sij beede sijn comen van liue ter doot so es tvorseide huus vri ende ontslegen van alder vorseider lijfrenten Ende Jan van den gauere ende alijsse sijn wijf sullen dat vorseide huus ende stede wel ende soffisanteleke houden te ghereke van dake ende van weeghen ende van al dies hem behouuen sal altoos meer beterende dan erghende ende dit met haren costen ende ghelden alle Jare den lantcheins vort es ghelofte ende vorwaerde Jnde dese comenscepe dat gillis de hodeueere ende aechte sijn wetteleke wijf zullen behouden in dit huus ende stede haar lieder leuen lanc zonder haren cost twee solres slot vast tharen aysemente al sulke neeringhe in te doene als hem ghelieuen sal ende een bedde staende beneden vp den vloer haren wille mede te doene ende hebben haerre lieder gaen ende keeren dor thuus ten lochtine huut ende behouden alf den lochtin them waert tharen aysemente ende profite
vort sullen sij behouden de kokene ende eene scaperade ende den stal sal wesen ghemeene Ende dit sal wesen also langhe als gillis ende aechte sijn wijf of de lancste leuende van hem beeden leuen zullen ende niet langhere Ende mids desen gheloften coop ende vorwaerden so waren Jan van den gauere Ende alijsse sijn wijf ten vorseiden huse ende steden ghedaen metten lantheeren als te haren properen coop goede met al daer toe te doene dat men sculdich was te doene naer costume ende husage der stede van ghend die welke lijfrente ghelofte ende vorwaerden Jan ende alijsse sijn wijf vorseit hebben bewijst ende verzeekert vp tvorseide huus ende stede ende vp al dat siere binnen hebben of hebben sullen Ende vort vp hem beden Ende vp al haer goet Ende ware hier of eenich ghebrec dat hebben vort gheloft te vuldoene als goede borghen ende elc ouer al gillis van den vpbrouke ende Jan symoens Elc vp hem ende vp al tsine
</main>
<end>
hier ouer stonden Jn orcontscepen als lantheeren her willem van [tsalous] priester ende zegher van den velde als lantheere ende ontfanghere Jn den name van sente Jacops huse vorseit Ende alse heruachteghe lieden Jn ghend pietertsmet ende matheus de vijlre dit was ghedaen Jnt Jaer ons heeren alse men screef M ccc seuene ende tseuentich vp den xiiijsten dach in wedemaent
</end>