Compilatiecorpus Historisch Nederlands 1.0 (CHN): ambtelijke teksten 1250-1800: gent_1397_1

<begin>
Wij Jan may[hu] lieuin van waes pieter van hessche wulfram wulframs Jacop braem Dekene ende prouiseres van sente Jacops huse in ghend kennen ende lyen
</begin>
<main>
Dat wij hebben ontfaen van fransoyse den coman ende katelinen sinen wiue de somme van twee ponde groter tornoyse dwelke wij met meer goets hebben beleit an een plecke van lande gheleghen te sente marien houden houe Voert es te wetene dat men elcs tsiaers sal doen fransoys jaer ghetide smaendaechs vor sente jacops ende sente kerstoffels dach De priester die dit jaer ghetide sal doen sal hebben twee grote Ende de prouengiers sullen hebben int ghemeene tiene grote teere pitanche Ende dies sulsi sijn ter messen Voert es te wetene dat kateline fransoys wedewe wille ende begheert Dat men haer jaer ghetide doet als soe sal commen sijn van liue ter doot Ende te diere messe alle de prouengiers sijnde dies sulsij hebben tiene grote int ghemeene om dat sij sullen bidden ouer de siele van hem beeden vorseit
</main>
<end>
Ende omme dat wij dekene ende prouiseres willen ende begheren dat al dese zake vulcomen werden goet vast ende wel ghehauden sijnde So hebben wij in kennessen der waerheden des godshuus zeghele hier an ghehanghen Dit was ghedaen int Jaer ons heeren dusentich driehondert ende seuen ende tneghentich up den xijsten dach van laumaent
</end>