Compilatiecorpus Historisch Nederlands 1.0 (CHN): ambtelijke teksten 1250-1800: gent_1411_1

<begin>
</begin>
<main>
Alse van den ghescille ende ghedinghe dat gheweest es in wetteliker vierscaren van ghedeele met deelbrieve ende met weerbrieve tusschen Katelinen Slanghen wedewe ende houderigghe bleven achter Martine van Sloete haren wetteliken man was an d'een zide ende Jacop Den Brant in den name ende als wettelik machtich in de stede van Mergrieten van Sloete siren wetteliken wive als hoyr van der eenre heelt van der versterfte van goede daer Martin van Sloete der vorscreven Mergrieten broeder was uutverstorven es ende houdste ende baerblikenste hoyr van den voorseiden Martin ende mids dien an hem treckende de leengoede bleven achter den vorscreven Martin an d'ander zide So hebben scepenen naer al dats vor hemlieden commen es ghevisenteert hebbende de ghescriften van partien an beeden zyden bi goeder deliberatien ghetermineert ende ghewyst van pointe te pointe in der manieren hier naer volghende
Eerst ten pointe [etc]
Item ten pointe daer de houderigghe in hare deelbrieve verclaert ende overghegheven heeft de goedinghen van Martin van Sloete haers mans was zyde commende te wetene I plaetse in den Hoyaert gheleghen houdende in leene van onsen gheduchten heere den hertoghe van Bourgoingnen grave van Vlaendren welc leen metgaders den huussen der up staende Jacop van Sloete Martins broder voertyts cochte ende ghecreech jeghen Laureis Melloes an hare treckende in de conclusie d'eene heeltsceede van den vorseiden II huussen als cateyle ende d'eene heeltsceede van den leene te harer bilevinghe daer Jacop De Brant in den name ende over Mergrieten van Sloete sinen wive toe verandwort heeft dat hy als houdste ende baerblikenste hoyr van Martine van Sloete haren broeder was ende te harer bouf an hem trect de vorscreven plaetse gheleghen in den Hoeyaert metten II huussen der up staende met al datter toebehoert erdvast ende naghelvast ghehouden in I vrien leene van onsen gheduchten heere den hertoghe van Bourgoingnen grave van Vlaendren van sinen casteele te Ghend segghende dat bliken mach bi I wetteliken tsaertre bezeghelt metten zeghele 's baillius ende mannen van den vorseiden casteele ende bi I wettelike copie uut scepenen bouke van der kuere in Ghend ende vort bi anderen bewysen van wetteliker kennessen dat de vorseide II huusse leen zyn ende die gheel ende al an hem treckende ter vorseider Mergrieten propren leengoede ende gronde ghelyc dat Martin sint de dooit van Jacoppe van Sloete sinen broeder paysivel ghebruuct heeft ende der uut verstorven es hem weerende vor scepenen te verandworden van der bilevinghe ende ghedeele van huussen die de vorscreven houderigghe in hare deelbrieve gheheescht heeft an de vorscreven plaetse ende huusse diere up staen hem dies presenterende te wette ende te vonnesse ten casteele te Ghend met meer woorden [etc] Up't welke de houderigghe gherepliceert heeft dat alle huusse staende binnen scependomme van Ghend ghelyc dat dese huusse staen in den Hoeyaert weder zy staen up leen ofte up erve sculdich syn ghedeelich te sine der houderigghe die blyft achter dien man d'eene heelt ende den hoyre d'ander heelt als cateile ende dat wel ende vaste ghecostumeert es binnen Ghend dat alle maniere van huussen staende binnen scependomme van Ghend schuldich syn ghedeelich te sine als cateile ende dat van den ghedeele van huussestaende binnen scependomme van Ghend niemant anders sculdich en es d'eerste kennesse te hebbene noch te wysene dan scepenen van ghedeele in Ghend met vele langhere redenen dier partien an beede zyden in haer ghescriften toe ghetoeght ende gheseit hebben
So eist dat scepenen ghevisenteert hebbende bi goeder deliberatien heesch ende andworde van partien ende oec ghevisenteert hebbende bi goeder vorsienichede 't inhouden van III tsaertren bezeghelt metten zeghele 's baillius ende mannen mins heeren van Vlaendren ten casteele te Ghend den eersten tsaertre sprekende in de date van den jare M CCC ende IX den anderen van der date van den jare M IIIo ende XVI ende den derden van der date van den jare M IIIo XCV bi welke tsaertren claerlic blyct dat de vorscreven huusse in den Hoeyaert desen sterfhuusse toebehoerende leen syn hovende ten casteele te Ghend ende raet ende avys der up ghehadt bi scepenen van der kuere hem deser zaken af daden ende termineren ende wysen naer al dats vor hemlieden commen es dat Kateline Slanghen vornomt up dat soe eenich recht van bilevinghe of ghedeel van huusse heesschen ofte halen wille an 't vorseide leengoed dat soe dies volghe voor den bailliu ende mannen myns heeren van Vlaendren ten casteele te Ghend diere af sculdich syn te kennene ende te wysene
Item daer de houderigghe overghegheven heeft [etc]
</main>
<end>
Actum XXmâ
</end>