Compilatiecorpus Historisch Nederlands 1.0 (CHN): ambtelijke teksten 1250-1800: gent_1415_1

<begin>
</begin>
<main>
1. In't iaer Ons Heeren XIIIIc ende vyftiene in 't scependom her Willems Utenhove her Wulfram Wulframs ende haren ghesellen scepenen van der kuere ende her Jan Sersanders her Lievin Papals ende haren ghesellen scepenen van ghedeele so was ghesloten uten laste ende overeendraghene van den goeden lieden van den drien leden der omme soffisantelic vergadert up den groten raedsolder volghende der privilegien ende vryheden van der voorseider stede van Ghend dat so wie ghebannen es ofte vort an ghebannen sal werden ofte verwonnen by der wet van Ghend van verdebraken met wonden ofte sonder wonde nemmermeer gratie hebben en sal noch verlaet van zinen banne maer sal moeten ballinc bliven t'slands van Vlaendren al den tijt van zinen banne ghedurende ende in 't ghelike de ghene die ghebannen werden van soendincbraken sonder wonde sullen moeten ballinc bliven al den tyt van haren banne
2. Ute dien dat questie ende twyfel gheresen es ter causen van der ordonnanche ende overeendraghene boven ghescreven aengaende den ghuenen die ghebannen zyn ofte die ghebannen mochten werden van zoendincbrake verdebrake met wonden of zonder wonde naer't gheruchte te wetene ofte die zouden of zullen moghen vercrighen de gracie van harer poort niet ieghenstaende der vorscreven ordonnanchen So es ghesloten ende overeenghedreghen by scepenen van beede den bancken ende beede de dekenen dat van nu voort an nyemene wie hy zy die ghebannen es ende gheen gracie heeft van der poort of ghebannen sal werden van faitte ghevallen by nachte buuten 's weeghen ende in eymelicker stede boven paeise ende zoendinghe ofte verde met wonden of zonder wonden naer 't gheruchte nemmermeer gracie hebben en zullen van harer poort maer zullen moeten ballinc bliven 's lands van Vlaendren al haren tyde duere ghelyc den ghuenen die daer af verwonnen zyn van wel wetene
</main>
<end>
Dit was aldus ghesloten ende gheordonneert den derden dach in julio in 't jaer XIIIIc een ende viertich in 't scependom mer Jan Vylains ruddere heere van Huusse Pamele Lilloe etc hier Ghelnoet van Leyns ende haren ghezellen
</end>