Compilatiecorpus Historisch Nederlands 1.0 (CHN): ambtelijke teksten 1250-1800: gent_1415_2

<begin>
</begin>
<main>
Alse van den ghescille ende ghedinghe dat gheweest es in wetteliker vierscaren van ghedeele met deelbrieven ende weerbrieven tusschen joncfrauwen Suffyen van Culsbrouc wedewe ende houderigghe bleven achter Henric van den Voerde haren man was met Janne van Munte nu haren wetteliken man ende vooght an d'een zyde ende Janne van den Voerde Willem van Papeghem ende Jacop Pielvaken als gheel hoyr van Heinric van den Voerde vorseit an d'ander zyde so hebben scepenen [etc]
Ende aldiesghelike wysen scepenen ghedeelich de somervruchten die in der houderigghen gront besaet waren ter doeit van Heinric haren man was ghemerct dat Heinric vorseit ghebeet ende overleefde alf meye dat alle somervruchten sculdich syn cateyle gherekent te sine
Item ten pointe daer de houderigghe verclaert ende overghegheven heeft de goedinghen in leenen erven ende ervelike renten van Heinrics zyde commende naer't verclaers van haren deelbrieven so termineren scepenen ende wysen naer heesch ende andworde van partien ende naer al dats vor hemlieden commen es den hoyre vornoomt te hebbene ende te behoudene te haren propren gronde de goedinghen in leenen erven ende ervelike renten van Heinrics zyde commende met al dien dat den gronde sculdich es te volghene behouden der houderigghen haer recht van bilevinghe an d'ervachtichede ende up dat soe eenich redit van bilevinghe heeschen ofte hebben wille an de leene hare dies te volghene ter stede daer de leene hoven ende te wette behoren ende de huussinghen boeme ende cateilen up de vorseide goedinghen rustende ende synde die den gronde van leenen ende van erven niet sculdich en syn te volghene metgaders den leeninghen latinghen ende besaetheden die de pachteren up de goedinghen sculdich syn te latene ten afsceedene van haren pachte ofte eer ende de achterstellen van pachten te wesene ghedeelich der houderigghen d'eene heelt ende den hoyre d'ander heelt elken last draghende in den commer uten goedinghen gaende naer dat elc bate heft alsoe 't behoort
Item ten pointe [etc]
</main>
<end>
Actum in vierscaren Actum XI die decembris
</end>