Compilatiecorpus Historisch Nederlands 1.0 (CHN): ambtelijke teksten 1250-1800: gent_1417_1

<begin>
</begin>
<main>
Ute dien dat men t'anderen tiden gheploghen heeft lichtelic t' ontfanghene poorteren in de stede wesende die hem voughden den heere van den lande of zinen vassallen te dienene in officien omme hemlieden in die officie ende omme die officie te bedienene t' ontvryene van haren poorterscepe ende dat mids desen vele van den notablen poorters van deser stede te meer te alzulken diensten hem ghegheven ende ghestelt hebben ende dat daer mede de voorseide stede zeere ghebloet es ende meer werden mochte van den notablen ende vroeden daer mede de stede wel gheholpen mochte wesen soe eest dat scepenen van beede den banken metgaders beede den dekenen ende den ghuenen die te haren rade behoeren omme hier in te voorsiene ende te remedierene ter meester eere orbeur ende profite van der stede ghemeenlic ende omme te scuwene de calaengen daer in dat de voorseide poorters die hem aldus ontpoorteren souden of in toecommenden tiden haerlieder hoir vallen mochten der of de stede ghescepen ware cost moeyte ende vervolgh te hebbene gheordonneert ende ghesloten hebben eendrachtelic dat men van nu voortan negheenen poortere ontfanghen en sal noch consenteren hem t' ontvryene ende t' ontpoorterene in eenighe officie of om eenighe officie buten te bedienene in enigher manieren nemaer eest zoe dat enich poortere hem ontvryen wille omme enighe officie te bedienene dat hi hem ontpoorteren sal van al t'al ende betalen yssue van sinen goede na de rechte van der stede
</main>
<end>
Dit was aldus ghesloten ende den goeden lieden van der stede ghemeenlic vergadert wesende up den collacie soldere te kennen ghegheven die daer in consent droughen ende wel ghepaeyt waren Ghedaen den anderen dach van ougstmaent in 't jaer XIIIIc ende XVII in 't scependom hier Victoers Vander Zickelen hier Robbrechts Van Ecke ende harer ghesellen
</end>