Compilatiecorpus Historisch Nederlands 1.0 (CHN): ambtelijke teksten 1250-1800: gent_1419_1

<begin>
In 't jaer Ons Heeren als men screef XIIIIc ende XIX
</begin>
<main>
dat ute dien dat handelinghe van zekeren ghedinge gheweist heeft voer scepenen van ghedeele in de stede van Ghend tusschen joncfrauwe Katelinen Daniels hauderigghe bleven naer de doet van Willemme den Stoppelare poertre binnen der stede van Ghend an d'een zide ende Raesse van den Wale als wettelic vooght van joncfrauwe Katelinen Stoppelaren zinen wive wylen 's voirseits Willems dochtre an d'andre zide sprutende ende toecommende omme dat de voirseide Raesse uter name van sinen vorseiden wive als een stake in de gheheele versterfte van den goede bleven na den vorseiden Willemme haren vadre was zekere ghedaen hebbende naer de costume van der cameren van ghedeele versochte ende begheerde ghenachte van ghedeele gheleit t' hebbene van alsulken goede als daer de vorseide Willem ute verstorven was
Ende aldaer so quam voer oeghen de vorseide hauderigghe ende dede zekere 't vorseide goed te bringhene ten rechten ghedeele omme elken daer af te hebbene evenverre dat hy der an ghedeelich ware metten rechte ende begheerde ende versochte insghelicx ghenachte van ghedeele te hebbene ghemerct dat zo hauderigghe ware weerende den vorseiden Raessen 't ghuent dat hy versocht hadde omme dat hy van den ghedeele niet ne was bestaende in zibben den dooden alsoe zo seide ende al waer't dat joncfrauwe Katheline zyn wyf van den ghedeele ware nochtan so ne was nieuwers by consente van den vorseiden Raessen de ghenachte versouckende noch ne hadde oec gheenen zekere ghedaen want soe uten lande ware ende vervreemt van den vorseiden Raessen ende al hadde de voirseide Raesse zekere ghedaen naer de costume van der cameren bate te heffene ende commer te draghene in 't voirseide steerfhuus dat ne ware niet ghenouch want de vorseide hauderigghe met eenen ghedeele ende met eenre quytsceldinghen sculdich was te ontstane naer rechte alsoe zo seide 't welke niet gheschien en zoude by also dat de vorseide joncfrauwe Katheline die buten 's lands es gheen consent ghedreghen ne hadde in de voirseide quytsceldinghe of daer zo wedercommen zynde ghenachte van ghedeele begheerde te legghene van den goede bleven naer de doot van haren vorseiden doeden vader want in de afwinninghe die de vorseide Raesse doen soude van den voirseiden goede zouden ute ghenomen wesen uutlandsche liede ende onbejaerde kindere ende aldus so soude de voirseide hauderigghe groetelic bedroghien wesen alsoe zo seide het en ware dat de voirseide Raesse haer zeker dade als dat zoe met eenre quytscheldinghen ontstaen soude Waer up de voirseide Raesse dede repliquieren segghende dat hy vooght ware van sinen voirseiden wive ende dat zy niet ghescheeden ne waren van mallinchanderen ten spirituelen hove noch anders ende dat hy mids dien wel machtich was ghenachten te eesschene want alwaer 't dat zoe voer hoghen ware nochtan soude zo moeten by hem daer toe gheauctoriseert wesen ende mids dien dat haer de auctoriteit van hem commen zoude te wette te sprekene up dat zo voor hoghen ware ende dat zo by gheenre redeliker cause nemaer by haren quaden wille ende anders van hem vervremt es niet verscheeden by eeneghen hove so bleec claerlike dat hy als hooft vooght ende man wel ontfanghelic es de ghenachten te eesschene ende te hebbene ende oec voor de vorseide hauderigghe alsoe hy seide ghemerct dat hy se voren versocht heeft ende weerde hem der toe eeneghen anderen zekere te doene te wette dan hy ghedaen hadde ende men ghecostumeert was bi den redenen voirseit segghende voert dat de voirseide afwinninghe overleden zynde zyn voirseide wyf nemmermeer ontfanghelic zoude zyn daer ieghen te segghene te wette in eenegher mannieren ende ne dient al ter materien niet dat so buten 's lands ghetrocken es want zoe 't ghedaen heeft by haren quaden wille ende omme den voirseiden Racen haren man t' ontkeerene 't ghuend dat hy van der vorseider versteerften sculdich es te hebbene metten rechte want by dusdanen weghe souden of mochten vele vrauwen die scoene versterften voer hoghen hebben up hopen van dien hem ontvremden van haren gheselscepe ende dat versteken van den ghenen daer 't andeelich an zoude wesen metten rechte 't welke eene zake ware van quaden exemple ieghen redene ende recht ende een wegh te zondene ende quaet doene met vele redenen diere partien toe zeiden al in 't langhe
So ne waren scepenen van ghedeele deser questien niet so vroet ghemerct ende gheweghen de redenen van beeden partien zy ne droughen die voer scepenen van der kuere omme haren vroedom der up te hebbene ende na vele deliberacien bi hemlieden der up ghehadt zy ne waren 's oec niet so wys noch so vroet zy ne droughen de zake voert over eendrachtelic metgaders scepenen van ghedeele an de notable van der stede van Ghend van den drien leden notabelike der up vergadert de welke naer vele deliberacien der up ghehadt gaven uut in vroedomme in deser manieren Dat waer 't alsoe dat de vorseide Race uter name van zinen wive goeden soffisanten zekere dade van alsulken goede als hare verstorven mochte wesen van haren doeden vadre dat hy sculdich was de ghenachten van ghedeele te hebbene ende vooren of al eer de vorseide hauderigghe ghemerct dat hy se voren versocht hadde niet jeghenstaende dat syn voirseide wyf niet voer oeghen ne ware maer buten s lands of eldere daer 't hare gheliefde ende dat hy als vooght ende man de afwinninghe doen soude uter name van hare van alsulken goede als hare verstorven mochte zyn by der doot van den vorseiden Willemme behouden dien dat alsulke ervachticheit als hare bider selver doot verschenen ende toecommen soude zyn hy niet vervremden belasten noch bezwaren ne zoude moghen in eenegher mannieren
</main>
<end>
Actum ut suprà
</end>