Compilatiecorpus Historisch Nederlands 1.0 (CHN): ambtelijke teksten 1250-1800: gent_1431_1

<begin>
</begin>
<main>
1. Omme dat men langhen tyt bevonden heift ende noch daghelicx bevindt zo lanc zo meer dat diveerssche personen van buten hemlieden pinen subtylike te vercrighene ende bedectelicke de poorterie van deser stede zonder't weten van haren ghedieden ghebueren mids dat zy met aller wuensten bliven zittende ter plaetsen daer zy wonen ende dat bidien elc waent dat zulke persone ghediede zyn nochtanne dat zy hemelike binnen deser stede huringhe houden van eener camere oft andre wyncle die zy niet bezitten noch anders oorboren dan alleenlike om te bedrieghene hare voorseide gheburen van buten dat es als zy jeghen hemlieden yet gaens hebben van twiste of andre zaken daer af dat den tyd overlydt van dat men se hier te wette bringhen mach ende dat men ter causen van dien buten te wette up hemlieden procederen wille danne commen zy hier gheloopen ende werden poorters bekent bi der orcondscepe van eenighen scamelen lieden gheseten omtrent de plaetsen daer zy hare voorseide huringhe houden oft eldre die meenen mids der costume daer af langhe gheploghen dat zulke huringhe van cameren ghenouch es om 't poorterscip van deser stede te vercrighene ende dat meer es eist dat wel te tyde de wettelichede van den zelven twiste oft andre zaken hier verzocht werdt zo zwighen zulke personen van haerlieder voorseider hemelike huringhe ende bliven ghediede dus zyn zy poorters als zy willen dat groote blaemte es om de poorterie van deser stede die niet sculdich es te stane t'yemens wille noch zo breet te streckene nemaer dat men se vercrighe naer 't inhouden van den privilege ende daertoe en werden niet alleenlike bi der voorseider hemeliker verhuringhe van husen of cameren bedroghen de ghediede gheburen van den voorseiden personen die se van buten alzo hier commen huren nemaer ooc justicie grotelike ghecorrumpeert ende verachtert want menighe faiten ende quatheden bliven bidien buten ende binnen onghecorrigiert ende als dat ghevalt in een maertse zo werden hier vele van den zaken brocht te wette die daer ghevallen van vare dat de ghediede hebben haerlieder wettelichede te verliesene mids dat zy niet en weten of hare wederpartie hier eenighe hemelike hueringhe heeft of en doet daermede dat scepenen van deser stede dickent groote moyte hebben ende dat menichwaerf te vergheifs zonderlinghe als zy de zake ghediede bevinden ten groten quetse van der daghender partie ende in achterdeele van den goede lieden van deser stede die onberecht bliven by zulken beletten ende bander zide vallen van tide te tide vele questien bi zulker hemeliker huringhe tusschen deser stede ende den gheesteliken hoven van hier omtrent als de personen die se houden van yemene daer gheraken betrocken te zine ende dat up hemlieden de prochipapen van buten zeghelen of dat hi se uutroupt verwaten of bezeendt ghelike haren andren prochianen want dan begheeren de zelve personen bescudt te zine ende gescreven t' hebbene an de zelve prochipapen dat zy up hemlieden niet meer zeghelen of procederen ende eist dat zy achterhaelt zyn ende verwonnen in de voorseide hoven danof willen zy ooc ontgaen metten previlege van deser stede die by zulken weghen ghescepen ware binnen lancheit van tyde vercurdt te werdene ghelike dat alnu 't recht van yssuwen ende meer andre rechten van deser stede dickwile vercurdt werden ende ooc verloren bi den ghonen die zulke hemelike huringhe hier houden ende maken de porterie van deser stede zo breet datter vele meer personen bi ghequetst zyn ende bescampt dan vervoordert ende bescudt in grooter verachteringhe van justitien ende van ons gheduchs heeren heerlicheyt die elken recht ende justitie sculdich es ende te meer stonden scerpelike ghelast heeft ende bevolen te voorsiene in de voorseide zake
So es gheordineirt ende men ghebiedt [etc] Dat van nu voortan elc wie hy zy die van buten incommen wille ende 't porterscip van deser stede met wuensten vercrighen uute doe roupen ende publieren ter plaetsen daer hy wuent bi zinen prochipape in de hoochmesse tyt up eenen zondach ter poyen dat hy van daer vertrecken wille ende binnen deser stede commen wonen omme poortere met wuensten te bediedene ende danof bringhe goede lettren van certificatie bezeghelt met zyns prochipapen zeghele an scepenen van der kuere ende die hemlieden presenteren ende zo vele te doene dat zy dat doen teekenen in haren handbouc oft anders al quame hy hier wonen het en zoude hem gheene stade doen om 't poorterscip van deser stede te vercrighene bi wuensten nemaer de voorseide uutroupinghe ghedaen zynde van dien tyt voort dat zoe beteekent werdt in den voorseiden handbouc eist dat hi te deser stede voert comt ende daer naer wuent jaer ende dach erdvast ende buucvast met zinen wive ende kinderen ende emmer met vulcommer hebbinghe naer zinen staet zo zal hy in dat caes porterscip moghen vercrighen met zulker wuensten ende met gheener andre ende dat ooc alst VII scepenen van der kuere kenlic es ende niet eer behoudelic dies dat hy zyns zelfs man zy buten bandoene van vader of van moeder ende wie anders de porterie van deser stede pynde te vercrighene het en ware bi dienste dat ware up de boete van XX ponden parisise ende vort up de correctie van scepenen ende nochtan zo zoude hy ghediede bliven
2. Item ende mids dat 't privilege van deser stede inhoudt 1 zo wie dat van buten incomt ende jaer ende dach wuent binnen deser stede dat hy sculdich es poortere bekent te zine de welke kennesse leicht in scepenen van der kuere ende in niemene anders ende dat bi dien claerlike blyct dat niement die van buten incommen es poortre ghezyn can voor dat hy portre bekent es bi scepenen danof dat men eenen tyd de contrarie gheuseirt heift want lettel yement die van buten inquam zyn porterscip liet bliken voor dat hy eenich fait ghedaen hadde of wat gaens ieghen zine gheburen van buten 't welke fraudelic ende bedrieghelic was in hem zelven ende ooc ghemoetende den vorseiden privilege in also velen als dat de incommelinghe porters zyn zouden vor dat zy porters bekent waren dat in gheenre manieren sculdich es te zine naer den uutwisene van den zelven privilege
Dus zo es voort gheordineert ende men ghebiedt dat niement wie hy zy die van buten incommen es zichtent Paesschen anno XXX laetsleden of van deser tyd voort incommen zal in wat neeringhen of ambachte dat hi bevryt zy of werdt binnen deser stede hem eenichsins ghehelpe metter porterie van hier hi en zy alvoren portre bekent bi VII scepenen van der kuere die niemene poortre met wuensten bekennen zullen het en zy dat hy hier jaer ende dach ghewuent heeft ghelike ende in der manieren dat hierboven verclaert staet ende wie van buten incommen zynde also voorseit es eer gheholpe metter porterie of vriheyt van deser stede het ware in lieden hier t' ombiedene oft eenighe zaken te wette te bringhene oft anders in eenigher manieren dat ware up de boeten van I ponden parisise ende voort up de correctie van scepenen bi alsodat van civilen zaken ware nemaer van criminelen zaken dat ware up den ban van X jaren ende nochtan zoude hy in 't een ende 't andre ghediede bliven ende van die porters bekent werden zullen scepenen eenen registre doen houden
3. Item ende omme dat vele personen die van buten incommen als zy 't porterscip van deser stede vercreghen hebben niet meer rouken hier te wuenene Zo es gheordineert ende men ghebiedt dat van nu voortan alle de ghone die van buten incommen zyn ende 't poorterscip van deser stede vercreghen hebben met woonsten ende dat zonderlinghe zichtent den voorseiden Paesschen anno XXXo eist dat zy gheene behuusde stede hebben die hemlieden toebehoort of dat zy gheene opene doen houden in haerlieder name dat zy ten minsten openbare wuenste bliven houdende binnen deser stede ende zelve in persone zyn den meesten deel van den jare ende emmer zulken tyd als scepenen van der kuere redelic dynken sal den welken scepenen elc incommere dies behouft ghehouden werdt van jare te jare te doen blikene hoe hy zyn porterscip onderhoudt ende waer zine openbare wuenste es binnen Ghend ten fine dat men dat beteekenen moghe in de brieven die de voorseide incommers vercrighen zullen van hofslutinghen oft anders ende daer mede haerlieder partie weten waer zy se zullen doen dachvaerden want al nu dicwille vele moeyten ende donkerheden ghevallen es omme dat lettel lieden wisten te sprekene van zulke porters wuensten ende zo wie dat zyn voorseide porterscip also niet onderhilde die zoud't verliesen ende daer toe yssuwe betalen van zinen goede of het en ware dat hy eenighe noodsinne of andre cause van absentien hadde daerbi dat hy zyn voorseide porterscip niet also hadde moghen onderhouden oft emmer zulke andre redelike zake wiste te betoghene als dat hy 't van rechtsweghe niet sculdich ware up die mate t' onderhoudene waer af scepenen 't verclaers t'hemwaerts behouden om elken altyds te bewaerne zyns rechts
</main>
<end>
Uutgheleit XI in ougste anno XXXI in 't scependom her Clays van Hoedevelde her Nichasis De Bels ende harer ghesellen
</end>