Compilatiecorpus Historisch Nederlands 1.0 (CHN): ambtelijke teksten 1250-1800: gent_1450_1

<begin>
</begin>
<main>
Naer de handelinghe van ghedinghe gheweest voor scepenen in wetteliker vierscaren van ghedeele met deelbrieven ende werbrieven tusschen Gheerrom Portier als houdre bleven achter joncfrouwen Mergrieten Van den Berghe zynen wetteliken wive was an d'een zyde Jan Van den Velde over hem zelven Ghyselbrecht Buekel als wettelic machtich over Katelinen Van den Bossche Jans dochter weduwe van Michiel Van den Bossche die men hiet Cornelis Gillis Cnudde als wettelic machtich over Claren Strevele weduwe Jan Haenbech Lysbette Vaenkins moeder ende vooght van haren kindren die zoe hadde by Heinne Van den Velde hueren man was by consente van Philipse Haenkin nu haren wetteliken man deze vornoomde personen als hoir van gheel der vaderlicker zyden mids dat zy in de wettelieke puerge ende afwinningbe die zy daer af ghedaen hebben in wettelieken vierscaeren vervaen hebben alle de ghuene die elcx stake meer ancleven ende Arend van Bost als hoir van gheel der moederliker zyden mids dat hy insghelycs vervaen heeft alle de ghene die der moederlicker zyden meer ancleven van der versterften van joncfrauwen Mergriete Van den Berghe 's hauders wyf was vorseit an d'andre zyde
so eist dat scepenen de voirseide deelbrieven ende weerbrieve oversien al in 't langhe ghevisenteert ende wel ende rypelic daer up gheledt hebbende alsoo 't behoorende hebben daer up gheordineirt ende ghemaect haerlieder terminacie ende vonnesse also hier naer volght van pointe te pointe
Eerst [enz]
Item ten ghonen daer de vornoomde houdre upbrocht ende verclaert heeft 't goet van zynder zyde commende beghinnende « eerst't vierendeel van eenen woenhuuse t'sente Baefs» also dat point inhoudt metter conclusien die hy daer toe ghemaect heeft daer inne dat hy t'hemwaerts tract 't selve goet evenverre dadt eerve es als van zynder zyde commen ende van de huusinghen ende cattheelen daer up staende d'een heeltscheede also zyne deelbrieven datte met meer woorden breeder verclaren
ten welken 't vornoomde hoir verandwoordt heeft dat de houdre met quader causen an hem ghetrocken heeft 't vorscreven goet als eerve ende steden binnen Ghend daer eerflicke rente ende lantcheins uutgaet het zy t' sente Pieters t' sente Baefs ter Muden up d'Nieulant t'Eckerghem of heldre daer diverssche heerlicheden inligghen ende begrepen zyn verre als men met wonsten poortrien binnen Ghend vercrighen mach sculdich zyn ghedeelich te zyne als haeflic ende ghedeelich goet niet jeghenstaende van wiens zyde zulke huusen commen zyn naer 't recht van den steerfhuuse van Ghend ende der wet van der poort daer up dat 't hoyr van dien vermet gheleyt heeft heesschende mids dien te hebbene duergaende d'een heeltscheede van den vorseiden goede huusen ende steden met allen den plaetsen rechten aysemente ende ghelaghen dat toebehorende an allen zyden van vooren toot achter also de houdre in zyne deelbrieve datte verclaert heeft
jeghen de welke de vornoomde houdre ghereplyquiert heeft dat zo wye binnen sente Baefs eenich huus metter eerven by coope verwandeelt gheven moet van den zelven eerven maereghelt van hondert ponden de zesse ende mids dien volght daer de eerven der zyden daer of dat zoe commen es dus sluut dat de conclusie by hem ghegheven in zyne deelbrieve als van desen behoorlic ende te rechte ghemaect ende ghefondeert es up d'welke't vornoomde hoyr gheduplyquiert heeft blivende by huerlieder vorscreven eerste andwoorde ende by 't ghuent dat de previleghe ende vryhede van deser stede wel begrypt met meer woorden by partien daer toe ghealigiert Zo termyneren scepenen ende wyzen naer heesch ende andwoorde van partien 't voornoomde goet by den houdre in dit article verclaert als van zynder zyden commende te wesene ghedeelich tusschen den zelven houdre ende hoyre mids dat datte naer 't recht van den steerfhuuse ende der wet van der poort also sculdich es te zyne by sulken redenen als 't hoir ghenoopt hebben ende hiervoren verhaelt zyn ende meer andre hier achtergelaten omme de cortinghe Item ten ghonen enz
</main>
<end>
Actum XVII junii anno L
</end>