Compilatiecorpus Historisch Nederlands 1.0 (CHN): ambtelijke teksten 1250-1800: gent_1451_1

<begin>
</begin>
<main>
Naer de handelinghe van ghedinghe gheweest in wettelike ghebannene vierscare van ghedeele met deelbrieven ende weerbrieven tusschen edelen ende weerden Janne De Vos heere van Pollaer [etc] als haudere bleven achter edele ende weerde jouffrauwe Jaqueminen van Maldeghem ziere gheselnede was an d'een zyde ende edele ende weerde mer Jan Van Selle heere van der Riest ende van Bernisaert als gheel hoyr puerge ende afwinninghe ghedaen hebbende van alsulken goede ende versterfte als daer de voorseide jouffrauw Jaquemine 's voorseiden Jans gheselnede was uut verstorven es an d'ander zyde so eyst dat scepenen gheviseteert hebbende de ghescriften van partyen an beede zyden ende daer up wel ende rypelic gheledt alsoo 't behoorde met ghoeder delyberacien ende vorsienicheden hebben daer up ghetermineert ende ghewyst van poeinte te poeinte zo hier naer verclaert staet ende volght
Eerst ten ghonen daer de vornoomde hauder in 't prohemium ende beghin van synen deelbrieven begheert heeft onverlet te stane van ghoede dat men namaels in baten ofte in comere bevinden conste of mochte desen ghedeele toebehorende meer dan zyne deelbrieve inhauden by sulcken redenen van onsculden als de selve zyne deelbrieve inhauden ende mencioen maken daer toe de vorseide mer Jan Vander Riest als gheel hoir van der vornoomder joncfrauwen Jaquemynen verhandwordt heeft dat hy den vorseiden haudere wert alle verandelynghe verwandelynghe van eesschen verdiepynghen van 1 vermeersynghe van vermeten ende ooc dat hy den selven haudere wert onverledt oft onbegrepen te stane van eenigghen ghoede in baten of in commere den vorseiden sterfhuuse toebehorende verder of breeder dan hy in zyne deelbrieve expresselic upbrocht ende verclaert heeft ende den tax van zynen eede hem by onse heeren scepen gheordoneert was up XX lib grooten dat hy naer ghescreven poeinten van prevelegen ende de rechten ende costumen van der vierscaren van ghedeele in ghelycken zaken onderhauden niet sculdich en es vorder onverledt te stane versouckende zelve onverledt te stane naer huutwysene van den vorseiden prevelegen rechten ende costumen van der vorseiden vierscaren van alle manieren van ghoede ende baten die hy bevinden sal moghen desen ghedeele toebehorende meer dan de haudere in zyne deelbrieven upbrocht en verclaert heeft omme sulc ghoed ende bate den vorseiden hoire alleene te hebbene te zynen properen ghoede te wetene d'eene helt als 's hoyrs verstorven ghoed ende d'ander heelt als verloechent ende verbuert ende es sculdich bovendien alleene ghehauden te zyne in alle sculden ende commeren die men den hoyre ter causen van der zelver versterften emmermeer heesschen mochte boven den inhaudene van den vornoomden deelbrieven met meer worden [etc]
So termineren scepenen ende wysen den vornoomden haudere onverledt ende onbegrepen te stane van ghoede dat hy niet en wiste of sculdich was te wetene ten overbrynghene van zynen deelbrieven ende 't hoyr staende onverledt ende in zynen ghoeden rechte van alle manieren van verloechenden ende versweghenen ghoede dat men boven den verclaerse van 's hauders deelbrieven sal moghen bevinden dat hy wiste of sculdich was te wetene ten overbrynghene van den selven deelbrieven desen ghedeele toebehorende volghende der wet van der poort emmer den vornoomden haudere een waerven te baten commende den tax van zynen eede die hem scepenen ordineren uut gracien
Item ten poeinte [etc]
Item ten ghonen daer de vorseide haudere verclaert heeft in zyne deelbrieven de ghoedynghen gheconquesteert binnen huwelicke van hem ende joncfrauwen Jaquemynen zier gheselnede was vornoomt « eerst jeghen de graffelichede van Zeelant een tiende groet XXVII ghemete lettel min of meer haudende in leene van der graffelicede vorseit die de vorseide haudere ontfaen heeft zo hy seght gheleghen in Walcheren ende in Borsele » daer naer verclarende 't recht van vier waerf twintich XIIII ghemeten erven in dyveersen prochien ende partseelen in Zeelant comende huuten sterfhuuse van vrouwe Lisbetten van Maldeghem myns heeren van Huutkercke gheselnede was metten concluusye by den vornoomden haudere daer up ghenomen daer in hy hem ghetrocken heeft te wetene gheel en al de vorseide tiende leen synde gheleghen in Zeelant met allen haren toebehoorten also hy die ontfaen heeft en wettelic daer toe commen es als zyn proper ghoed zonder yement anders eenich recht an te hebbene ende van den vorscrevenen rechte van der ghecochter erven an hem treckende d'een heelt t'synen properen ghoede met al den rechten baten ende proffyten die daer toebehoren ende ancleven moghen en an d'ander heelt t'syre bylevynghen de heelt vort evenverre dat menre eenigghe cattheylen daer anclevende up bevinden mach desen ghedeele toebehorende daer af trect de hauder an hem d'een heelt als zyn proper ghoed d'ander gha daer 't sculdich es te ghane elcken zyn last draghende in den commer dier up es ende huut ghaet ieghen de vornoemde mer Jan als hoyr verandwoord heeft dat hy an hem trect d'een heeltsceede van alder ervachticheden by den haudere verclaert in zyne deelbrieve ghecocht binnen huwelicke zo vorseit es met alle den cattheylen dier toebehoren ende ancleven ende als ten XXVII ghemeten leen wesende d'welcke es een thiende dat de hauder seght ontfaen hebbende buuten by den heere alsoo't behoort heeft de vornoomde mer Jan verandwordt dat de hauder met quader causen 't vornoomde leen an hem ghetrocken heeft als zyn proper ghoed mids dat men wel bevinden saude dat hy 't vorseide leen ghecocht heeft metten ghoede toebehorende der vorseide joncfrauwen Jaquemynen ende ware mids dien jeghen recht dat hem de vorseide haudere also ghoeden saude sonder den hoire begroetynghe te doene van der eender heeltsceede van den coepscatte also hy sculdich es te doene dies hy hem wel ghetroest in de rechten ende costuumen van der plaetsen daer 't vorseide leen resoorteert en te wette behoort daer hy den haudere van dien presenteert te rechte te stane ende als van der bylevinghen die de vornoomde hauder beghert te hebbene an de ghecochte heerve zeeght in also verren als eenigghe van der ghecochten heerven gheleghen es binnen Vlaenderen ghesciede dat daer af sculdich es te ghesciene maer van dier buuten gheleghen es in Zeelant es de hauder sculdich zyn bylevynghe te heesschene ter plaetsen daer die te wette behoort versouckende voort te hebbene d'een heelt van alle de boemen cattheylen leenynghen latynghen ende prysyen up de vorseide ghecochte ghoedynghen rustende ende oec als boven onverledt te stane van verloechenden ghoede

#...#

</main>
<end>
Actum by concente van partyen vornoomt in cameren van ghedeele den vierden dach in meye a LI
</end>