Compilatiecorpus Historisch Nederlands 1.0 (CHN): ambtelijke teksten 1250-1800: gent_1455_1

<begin>
</begin>
<main>
Up 't ghuend dat hoghe ende edele heere heer Arnoul de Goy heere d'Auby ende hoochbaillu van Ghend begheerde te stellene van ons geduchs heeren weghe eenen baillu of maenre in elke vinderie ende plaetsen gheliic voor alheeren daer men wet dede met baillius ende maeners segghende dat 't zelve stellen van den baillu of maenre de heerlicheyt van onsen harden zeere gheduchten heere ende prince ancleefde ende niement el ende al waes't dat der contrarien hier voormaels gheuseert hadde ghesiin dat ware gheschiet jeghen recht want men by den privilegen niet betoghen conste dat scepenen dies machtich waren ende zulke costumen waren metten payse te nieuten ghedaen jeghen 't welke scepenen van der kuere in Ghend deden segghen dat van houden tyden 't stellen van allen den smalen officien binnen deser stede gheheelic ende al toebehoorde scepenen van der kuere ende also wel van den baillius ende maenres van vindren van alheeren als d'andre ende hadde de stede daer af gheweest voor d'oorloghe ende ooc sandert den oorloghe in possessie ende niement en leefde die de contrarie ghesien hadde achtervolghende dien hadden de selve officien nu gheordineert ghemaect ende uutghegheven baden mids dien den voornoemden heere baillu dat hi te vrede wilde wesen dat de selve officiers eet daden ende al waes 't dat men se hiet baillu of maenres behouden der weerdicheyt van elken zy en waren maer calaengnescrivers ende en deden gheene maninghe so wart by vriendclichede gheappointert ende by mynen voorseiden heere de bailliu gheconsenteert ter bede van scepenen voornoemt dat anghesien dat de voorseide vinders alheeren ende andre smale officien ende insghelycx de baillius ende maenres daer toe dienende uutghegheven hadden gheweest voor't volc de voornoemde baillius ende maenres van den voornoemden vindren ende smalen officien te deser waerft eet zoude doen onvermindert 't recht van onsen harden gheduchten heere ende prince ende ooc van der stede emmer behouden dien dat daer mede de stede gheen recht vercrighen sal up den voornoemden minen gheduchten heere ende dat zy hemlieden daermede niet ghehelpen zullen in eenegher manieren
</main>
<end>
Actum II octobris anno LV
</end>