Compilatiecorpus Historisch Nederlands 1.0 (CHN): ambtelijke teksten 1250-1800: gent_1455_2

<begin>
Uutgheleit den XXIIII dach van novembre in 't jaer XIIIIc vive ende vichtich in 't scependom her Jans van Vaernewyc eere van Exaerde her Oliviere 's Graven ende haren ghesellen
</begin>
<main>
Omme dieswille dat scepenen van ghedeele als uppervoochden van den weezen van dezer stede daghelicx toecommen ende bevinden grote zwaere ghebreken ten groten achterdeele van den voorseiden wesen in't ghoent dat haerlieder voochden den staet van haerlieder goede niet en gadren maken ende t' scepenen waert bringhen noch zekere doen van haerlieder voochdie ende voort dat zy niet alle jaere achtervolghende 't privilege rekeninghe ende bewys doen van alder handelinghen ende administratie in ontfanghe ende uutghevene die zy ghehadt hebben van haerlieder wezengoede voor scepenen van ghedeele of voor de naeste vrienden ende maghen van hemlieden in redeliken ghetaele
Wy ghebieden [etc] dat alle de ghene die voochden van wezen zyn of van nu voort an werden zullen dat zy maken ende gadren den staet van haerlieder wezen goede alzoo 't behoort ende die overgheven in ghescriften t' scepenen van ghedeele waert ende dat zy souffisanten zekere doen van der zelver huerlieder voochdie naer 't verclaers van den privilege daer af ghewaghende te wetene die nu voochden zyn binnen XL daghen eerst commende ende die van nu voort an voochden werden zullen binnen XL daghen naer dien dat zy voochden ghemaect werden ende voort dat zy alle jaere eens rekeninghe ende bewys doen van al der handelinghe ende beleede die zy gehadt hebben of voortan hebben zullen van haerlieder wesen goede in ontfanghe ende uutghevene 't zy voor scepenen van ghedeele of voor de naeste huerlieder vrienden ende maghen in redelike ghetaele up de correctie van scepenen
</main>
<end>
Dit selve was uutegheleit den XXVIIen dach van octobre a LXIII in het scependom her Jan Utenhove watergrave her Pieter Beys [etc] ende was gheleyt up de boete van X ponden parisis
</end>