Compilatiecorpus Historisch Nederlands 1.0 (CHN): ambtelijke teksten 1250-1800: gent_1483_2

<begin>
</begin>
<main>
Omme dat scepenen beseven hebben dat mids den voorghebode t'anderen tyden uutgheleyt angaende der erve huusen ende renten die de cloosters keerken ende heleghegheesten neerynghen ende gulden daghelix conquesteerden ende vercreghen jeghen weerlicke persoonen vele renten hemlieden afghelost zyn ende lanc so meer werden in zulker wys dat de diensten aelmoesenen ende andere duechden te nieuten gaen ende vermindert wesen zouden up datter niet inne voorsien en worde ende omme datte te doene so eist dat scepenen van beede den bancken ende beede de dekenen by goeder deliberacien ende voorsienicheden userende de macht die hemlieden toebehoort by den previlegie van den grave Guy gheordonneert overeenghedreghen ende ghesloten hebben in voorme van statute
1. Dat de kloosters keerken heleghegheesten neeringhen ende gulden van nu voort an zullen moghen coopen conquesteren ende vereryghen eerfelyke renten te lossene ende omme te belettene de practiquen die men useren mochte omme sulke rente onlosselic te makene so es de ordonnantie van scepenen ende dekenen voornomd dat men den coop tooten pennine achtiene ende niet daer boven maer daer onder noemen sal in de copien ende lettren diere af ghemaect zullen werden ten fyne dat de vercoopere ter date van der lossinghe metten penninghen daer in begrepen onstaen moghe ende waert datter gheen penninghen inne verclaert en stonden zo zoude nochtans de vercoopere de rente moghen lossen 't pont groten t'siaers omme zestien pont groten zonder meer
2. Item dat de voornomde cloosters keerken heleghegheesten neeringhen ende gulden niet langhere en boorghen de achterstellen van den vorseiden losrenten dan van drie jaren oft anders men zoude hemlieden van den sourpluse niet ghehauden syn betalinghe te doene
3. Item waert so dat zy eeneghe huusen oft erve voor principael of achterstellen afwonnen naer de wet van der poort dat zy in dat cas de zelve huusen ende erve weder vercoopen weerlyke persoonen binnen drie maenden naer de afwinninghe up de peyne van hondert ponden parisis te gane in drien ende dat te verhalene up den pand ende al ware de peyne verbuert nochtan zoude 't vercoopen moeten ghebueren binnen anderen drie maenden daer naer up ghelyke peyne
4. Item up dat men besiene dat in toecomenden tyden eeneghe compactie of appointementen ghemaect worden tusschen den vercoopere ende coopere van den voorseiden losrenten omme de zelve renten onlosselic te makene zo verclaren scepenen dat so wanneer zulc stic t'haerlieder kennesse commen sal het zy by anbrynghene van partien oft andersins de coopers verliesen zullen haerlieder rente ter ontlastinghe van den vercoopere ende der ypotheque
5. Item dat hem niement die weerlic es voortan en vervoordere eeneghe onlosselyke rente die een ander weerlic persoon sculdich es het zy up persoonen boorghen oft ypotheque up te draghene ende transporterene in gheestelyker oft dooder hand up de verbuerte van der selver rente
6. Item omme dat de cloosters keerken heleghegheesten neeringhen ende gulden de manniere vonden hebben eeneghe renten ende erve te doen coopene up de namen van weerlyke persoonen ende dan daer af de copien in haerlieder handen te ghecryghene zegghende dat de penninghen van hemlieden commen waren dat hem niement weerlic zynde van nu voort an en vervoordere zulke coopen te doene up de verbuerte van der rente
7. Item dat alle landheeren die rentboucken hauden hemlieden verdraghen eeneghe onlosselycke renten oft erve die de cloosteren keerken heleghegheesten neerynghen ende gulden by subtylheden coopen ende vercryghen mochten te stellene t'haerlieder boucke ende te stane over de voorseyde transporten up de boete van vyftich ponden parisis
8. Ende andersins blyft 't voornomde voorghebot dat uutgheleyt was den [] dach van [] anno [] goet gheel ende van weerden als of't inhauden van dien weder van nieux uutgheroupen ware
</main>
<end>
</end>